Пензада жыжымны тартыудан Россейни кубогу бардырылгъанды, анда 720-1000 килограмм ауурлукъ къауумда бизни командабыз биринчи жерни алгъанды. Ала бла республиканы Спорт министерствосунда тюбешиу болгъанды.
Эришиуге эр киши, тиширыу эм къатыш командала къатышхандыла. Хар команда 8 спортчудан къуралгъанды, бир адам запасной болгъанды. Бизни командагъа Сослан Дзуганов, Ахмед Курашев, Казбек Тхамитлоков, Игорь Афаунов, Мусарби Кудашев, Рустам Тхазеплов (жыжымны тартыудан федерацияны президенти эм команданы тренери), Анзор Шибзухов, Азамат Купов, Сосланбек Губжоков киргендиле. Ала болгъан ауурлукъда битеу да 6 субъектни келечилери эришгендиле. Жорукълагъа кёре, къытдыргъан чыгъып бармагъанды, ала барысы да бир бирлери бла тюбеширге керек эдиле. Жыжымны экишер кере тартхандыла, эсеп тенг болса, ючюнчю кере кёргендиле. Бизникиле битеу къалгъан командаланы 2:0 эсепле бла хорлагъандыла, ол санда финалда саратовчуланы да. Гёжефлерибизни бирге ауурлукълары бир тонна болгъанды.
Тюбешиуню ача, спорт министрни орунбасары Аналаны Аслан жыжымны тартыу бизде алыкъа артыкъ бек жайылмагъанын чертгенди. Алай эсе да, спортну бу тюрлюсюн жаратханла бардыла, жетишимле да къууандырадыла. Кубокда хорлагъаныбыз сейир этдирмегенди, ёхтемлендиргенди. Жыжымны тартыу Кавказны халкъларыны маданият эм спорт фестивальларында баш эришиуледен бириди, бизни гёжефле анда эм кючлюлени санындадыла, дегенди ол.
Казбек Тхамитлоков айтханнга кёре, аланы умутлары саугъаланнганланы санына кирирге эди, алай эсеп а андан да иги болгъанды. Мында хорлар ючюн, къарыудан, бёкемликден сора да, уллу магъананы адамны ёсюмю тутады, гёжеф бийик болургъа керекди, ол заманда жыжымны игирек тартырыкъды. Бизни команданы келечилери башхаладан иги да бийигирек эдиле, сора байламлыкъда ишлей биледиле. Ала барысы да спортну кюч тюрлюлери – тутушуу, пауэрлифтинг, ауур атлетика эм башхала бла кюрешедиле.
Спортну бу тюрлюсюнден регионда аккредитациясы болгъан федерация барды. Анда да спортну устасы, спортну устасына кандидат дегенча атла бериледиле. Республиканы районларында жыжымны тартыу бла кюреширге сюйгенле, ол санда тиширыула да, аз тюйюлдюле, аланы юйретиу иш барады. Аны бла байламлы Аналаны Аслан министерствону федерациягъа эришиу къураргъа неда башха болушлукъну этерге хазырлылыгъын билдиргенди.
Гёжефлерибиз 2020 жылда Россейни Санкт-Петербургда боллукъ чемпионатына къатышырыкъдыла, аны эсеплерине кёре, къыралны жыйымдыкъ командасы къураллыкъды. Жыжымны тартыу алгъа жыллада Олимпиадагъа киргенди, аны къайтарыуну юсюнден оюмла чыгъа турадыла.
