Тюнене Къабарты-Малкъар къырал университетде ариулукъгъа бла саулукъгъа жораланып «Вершина Кавказа» деген ючюнчю халкъла аралы форум, Жаш стоматологланы биринчи битеуроссей конференциялары эм «Междисциплинарная стоматология» олимпиадалары да башланнганды.
КъМКъУ-ну илму-излем жаны бла проректору Светлана Хаширова, жыйылыуну ача, анга къатышхан жаш специалистлеге жетишимле болдурурларын тежегенди. Ызы бла форумну къурагъан комитетни башчысы, стоматология эм сакъал-бет хирургия институтну таматасы Мустафаланы Магомет сёлешгенди.
- Бизни университетде «Стоматология» бёлюм ачылгъанда, кёпле& аны къыйматлыгъына ийнанмай, башламчылыкъгъа бюсюремегенлерин билдирген эдиле. Бюгюнлюкде уа форумгъа бизни выпускниклерибиз- айтхылыкъ врачла, алимле да келгендиле. Кёпле Россейде, Европада эм башха тыш къыраллада жетишимли урунадыла. Бу жол аланы экспертлени орунунда олтурургъа чакъыргъанбыз. Ала жаш къауумгъа юлгю болургъа керекдиле. Бирси жылла бла тенглешдиргенде, бусагъатда кафедрада иги билим алырча ахшы онгла къуралгъандыла. Ол себепден хар не да адамны кесинден къалады. Барыгъызгъа да жетишимле эм бийик усталыкъгъа жетерча тежейме, дегенди Мустафа улу.
Форумда Россейден, Къазахстандан, Узбекистандан эм жууукъ тыш къыралладан жаш алимле, студентле, ординаторла стоматология эм сакъал-бет хирургия эмда адамны саулугъун, ариулугъун сакъаларча тинтиу ишлери бла шагъырей этгендиле. Докладланы илму жаны бла магъаналарын тинтгенлени санында медицина илмуланы доктору, М.Ф. Владимирский атлы Москва областьны илму-излем клиника институтуну (МОНИКИ) хирургия стоматология эм имплантология кафедрасыны таматасы Малкан Ахмадова, медицина илмуланы доктору, профессор, Ташкентни къырал стоматология университетини факультет терапия стоматологиядан кафедрасыны таматасы Ольга Бекжанова, медицина илмуланы доктору, профессор, КъМКъУ-ну микробиология, вирусология эм иммунология кафедрасыны таматасы Заира Хараева болгъандыла.
- «Вершина Кавказа» форумну жаш алимлени докладлары бла ачылгъаны магъаналы шартды. Бёлюмню тамблагъы кюнде айнытырыкъ да аладыла. Адамны саулугъу, ариулугъу да аланы усталыкъларына кёре боллукъду, дегенди Заира Хараева.
Форумну эсеплери «Къабарты-Малкъар къырал университетни известияларында» басмаланырыкъдыла. Илму статьяланы уа Россейни алимлерини илму публикацияларыны базасында РИНЦ-да табаргъа боллукъду.
Конференцияны чеклеринде «Междисциплинарная стоматология» олимпиада да ётгенди. Анга Нальчикден, Москвадан, Пятигорскден, Узбекистандан эм Къазахстандан тогъуз къауум къатышхандыла. Ала ортопедия, хирургия, терапия эм диагностика номинациялада эришгендиле.
Ишлеге Москваны медико-стоматология университетини профессору, аты кенг белгили врач Михаил Ломакин башчылыкъ этген жюри къарагъанды. Докладланы конкурсунда эм усталыкъ жаны бла олимпиадада хорлагъанлагъа дипломла бла эсде къалырча саугъала берилликдиле.