КъМР-ни Башчысы Юрий Коков Пятигорскда Шимал Кавказны жаш тёлюсюню «Машук-2018» деген тогъузунчу билим бериу форумуну ачылыууна къатышханды.
Бу жай лагерь жыйгъан эки мингден артыкъ жаш адамны Россей Федерацияны Президенти Владимир Путин да алгъышлагъанды. Аны уа къырал башчыны СКФО-да толу эркинликли келечиси, Россейни Жигити Александр Матовников окъугъанды. «Багъалы шуёхла! Хунерли, иш кёллю, тири, Шимал Кавказны айныууна, аны онгларын хайырланыугъа юлюшлерин къошаргъа итиннген жаш адамланы жыл сайын мында бирге жыйылгъанлары ахшы тёреге айланнганы бек къууандырады. Энди бу форум хайырлы проектлени сюзюуню, предпринимательликге эмда жамауат башламчылыкълагъа себеплик этиуню даражалы майданыча атын айтдыргъанды.
Быйыл а кеси ыразылыгъы бла огъурлу ишле этиу, ол ниетни жайыу, ол огъурлу къымылдауну кючлендириу мында баш магъана тутады. Сизни хунеригиз, жыйышдыргъан сынауугъуз эсленмей къалмазлыкъларына ишексизме. Сизге тенглеригиз бла унутулмазлыкъ эмда хайырлы тюбешиуле, жетишимле, бар игиликле да тежейме»,-деп айтылады алгъышлау сёзде.
Юрий Коков Къабарты-Малкъарны чатырында, алгъын хорлагъан проектлени ярмаркасында да болгъанды, республиканы жаш тёлюсю бла да тюбешгенди, алагъа муратларыгъыздан артха турмагъыз, билимигизни, фахмугъузну да не къадар толу кёргюзтюрге кюрешигиз деп насийхат этгенди, мында кюнлери эсде къалырча болурларын тежегенди.
Тёреде болгъаныча, форум эки сменден къуралады. Биринчиси волонтёрлукъгъа аталады, экинчиси уа – граждан обществогъа.
Форумну къууанчлы ачылыууна РФ-ни Къырал Думасыны Председателини орунбасары Ольга Тимофеева, РФ-ни Къырал думасыны депутаты Ольга Казакова, Миллетлени ишлери жаны бла федерал агентствону таматасы Игорь Баринов, округну субъектлерини башчылары да къатышхандыла.
