Тюнене кюнню экинчи жарымында Правительствону юйюнде Казбек Коков Къабарты-Малкъарны Башчысыны къуллугъуна киришгенине аталгъан къууанчлы жыйылыу болгъанды. Анга республиканы власть органларыны эмда жамауатыны келечилери бла бирге сыйлы къонакъла да къатышхандыла. Ол санда РФ-ни Президентини Шимал-Кавказ федерал округда толу эркинликли келечиси, Россейни Жигити Александр Матовников, Шимал Кавказны ишлери жаны бла министр Сергей Чеботарев, РФ-ни Президентини Администрациясыны, Федерал Жыйылыуну къуллукъчулары, Къырал Думаны депутатлары да. Инаугурациягъа СКФО-ну республикаларыны, Адыгеяны, Юг Осетияны, Абхазияны башчылары да келгендиле.
Жыйылыуну КъМР-ни Парламентини спикери Татьяна Егорова ачханды. Ол «КъМР-ни Парламентини депутатлары КъМР-ни Башчысын айырыуну юсюнден» бегимни окъугъанды. Анда республиканы Конституциясына, федерал эмда республикалы законлагъа кёре, депутатла къол кётюрюп, Казбек Коковну Къабарты-Малкъарны Башчысына жууукъ беш жылгъа сайлагъанларыны юсюнден айтылгъанды. Бегим кючюне къабыл кёрюлген кюн - 3 октябрьде - киргенди.
Ызы бла Казбек Коковха республиканы Башчысыны полномочияларын бериу бла байламлы жумушла башланнгандыла. КъМР-ни Конституциялы сюдюню таматасы Геляхланы Абдуллах республиканы Баш законуну 80-чи статьясына кёре, Къабарты-Малкъарны Башчысы халкъгъа кертичи боллугъуна ант этерге кереклисин эсгертгенди. Аны тексти Конституцияда барды.
Алай бла Казбек Коков, онг къолун КъМР-ни Конституциясына салып, къуллугъун толтургъан кезиуде республиканы инсанларыны эркинликлерин, Конституцияны да толтурургъа, республиканы къыраллыгъын сакъларгъа, Къабарты-Малкъарны халкъыны излемлери ючюн къуллукъ этерге сёз бергенди.
Геляхланы Абдуллах Казбек Коков Къабарты-Малкъар Республиканы Башчысы болгъанын билдиргенди.
Битеу жорукъла толтурулгъандан сора алгъышлаула башланнгандыла. Биринчи Александр Матовников сёлешгенди. Ол бу кюн республиканы тарыхында, аны политика жашауунда магъаналы болгъанын чертгенди. «Къабарты-Малкъар кесини Башчысын айыргъанды. РФ-ни Президентини эмда Парламентни депутатлары этген сайлау сиз республиканы жамауат-политика, экономика, социал жашауунда тийишли мадарла толтургъаныгъызгъа шагъатлыкъ этеди. Болсада жетишимледе тохтап къалыргъа жарамайды. Мындан ары да инсанларыбызны жашау халларын, къолайлыкъларын игилендирир ючюн къадалып ишлерге керекди»,-дегенди ол.
Александр Анатольевич, Казбек Коков производствода, законла чыгъарыучу, толтуруучу органлада, къырал къуллукълада да уллу сынау жыйышдыргъанын белгилеп, билими республиканы оноучусуну къуллугъунда керек болгъанын чертгенди. Ол Казбек Коковну жашауу, къадары да республика бла байламлы болгъанын, адамла Къабарты-Малкъарны келир кюнюн, мамырлыкъны, тынчлыкъны жалчытыуну аны бла байламлы этгенлерин белгилегенди. «Барыгъызны да биригип, Башчыгъа салыннган борчланы толтурууда болушуругъузну тилейме. Кесим да, полпредча, не жаны бла да себеплик этерге сёз береме»,-дегенди ол.
Ызы бла республиканы оноучусун Сергей Чеботарев алгъышлагъанды. Ол Казбек Коковну РФ-ни Президентини Администрациясында ишлеген кезиуден бери таныгъанын, аны жууаплы, салыннган борчланы не жаны бла да тынгылы сюзген, чынтты профессионалныча билгенин чертгенди. «Энди уа сизни бу шартларыгъыз Къабарты-Малкъарны айнытыугъа ишлерикдиле. Къыралны оноучусу бизге стратегия магъаналы борчла салгъанды, ала миллет проектледе белгиленипдиле. Алада болгъан жумушла уа битеу сфералада да терк айнытыугъа бурулупдула. Бюгюнлюкде ала тамамланадыла, экономикада, транспортда, социал сферада, билим бериуде жангыртыу жумушла башланнгандыла. Регионла инвестицияланы кёбейтирге, экономика онгланы толусунлай хайырланыргъа тийишлидиле. Къысхасы, Казбек Валерьевич, сизге къадалып ишлерге тюшерикди»,-дегенди ол.
Федерал министр КъМР-ни биринчи президенти Валерий Коков республикагъа эм къыйын кезиуде башчылыкъ этгенин, КъМР-ни айнытыуну мурдорун салгъанын да чертгенди. «Сиз атагъыз башлагъан магъаналы ишни андан ары бардырлыгъыгъызгъа ийнанама»,-деп, Шимал Кавказны ишлери жаны бла министерство республикагъа не жаны бла да болушургъа хазыр болгъанын айтханды.
Ызы бла КъМР-ни Башчысын къоншу республикаланы таматалары алгъышлагъандыла. Биринчи Юг Осетия Республиканы Президенти Анатолий Бибилов сёлешгенди. Ол Казбек Коковну иш кёллюлюгю, республикагъа сюймеклиги уллу болгъанын, салыннган борчланы толтурур ючюн къолдан келгенни этеригине ийнаннганын белгилегенди. «Юг Осетияны бла Къабарты-Малкъарны араларында байламлыкъла эртте къуралгъандыла, мындан ары да ала кенгере барлыкъларына ийнанама»,-дегенди ол.
Адыгеяны башчысы Мурат Кумпилов а республиканы халкъы, къыралны башчысы да иги жанына тюрлениулени Казбек Коковну аты бла байлагъанларын белгилегенди. «Адыгеяны бла Къабарты-Малкъарны бирча шартлары кёпдюле. Эки къарындаш регионда да кёп миллетлени келечилери жашайдыла, аланы араларында мамырлыкъны, ышаннгылыкъны жалчытыу баш борчубузду. Шимал Кавказда тынчлыкъны сакълаугъа Валерий Мухамедович уллу къыйын салгъанды, сиз да аны юлгюсюнде регионланы арасында байламлыкъланы кючлерсиз деп ышанама»,-дегенди ол.
Шимал Осетия-Аланияны башчысы Вячеслав Битаров да республиканы оноучусуну сынаууну, профессионал билимини юслеринден айтханды. Республикаланы араларында экономика, культура байламлыкъла эрттеден жюрютюлгенлерин чертип, мындан ары да ала кючленириклерине ышаннганын билдиргенди.
Абхазияны вице премьер-министри Джансух Нанба уа республиканы башчысы Рауль Хаджимбаны алгъышлауун окъугъанды. Анда Казбек Коковха республиканы халкъына кертичилиги ючюн халкъда хурмет уллу болгъаны чертилгенди. «Сизни жууаплы адамныча, республиканы, къыралны керти патриотунча таныйдыла»,-деп жазылгъанды алгъышлауда эмда регионланы араларында байламлыкъланы андан ары бардырыуну магъанасы чертилгенди.
Ахырында Казбек Коков сёлешгенди. «РФ-ни Президенти Владимир Путиннге манга этилген уллу ышаныулукъ ючюн ыразылыгъымы айтыргъа сюеме. Жууаплылыкъны толусунлай ангылайма. Анга кертичи боллугъума сёз береме. Шёндю сизни аллыгъызда республиканы халкъына кертичи болургъа ант этгенме. Мен мамырлыкъны сюйген, иш кёллю халкъны кесеги болгъаныма бек ёхтемленеме. Къарыууму, билимими аямай, манга этилген ышаныулукъгъа кертичи боллугъуму энтта чертирге сюеме»,-дегенди ол ахырында.
