Озгъан ыйыкъда Нальчикде Къырал концерт залда Юйретиучюню эмда школгъа дери билим бериуде ишлегенлени кюнюн къууанчлы халда белгилегендиле. Аны хурметли къонакълары уа республиканы Парламентини билим бериу, илму эмда жаш тёлюню ишлери жаны бла комитетини председатели Нина Емузова, жарыкъландырыу, илму эмда жаш тёлюню ишлери жаны бла министр Ауес Кумыков, КъМР-ни Башчысында сабийни праволары жаны бла уполномоченной Светлана Тлинова, билим бериуде бла илмуда ишлегенлени профсоюзларыны рескомуну таматасы Сергей Карныш, Битеуроссей Халкъ фронтну республикада башчысы Евгений Бакаев, КъМКъУ-ну педагогика колледжини директору Фатима Ашабокова эм башхала болгъандыла.
Жыйылгъанланы кезиу-кезиу Ауес Мухамедович, Нина Гузеровна, Сергей Александрович да къызыу алгъышлагъандыла. Юйретиучюле сабийге салгъан къыйын кёзге терк окъуна урунуп къалмагъанлыкъгъа, уллу, магъаналы эмда къыйматлы болгъанын белгилегендиле. Министр а 19 школгъа дери билим берген объект ишленип бошалгъанларын, дагъыда 29-суну къурулушу да тауусула тургъанын билдиргенди.
Быллай ингирледе айырмалыланы саугъалау бла байламлы хычыуун кезиуле тёреге айланнгандыла. Ол кюн да кёпле белгиленнгендиле дипломла, грамотала, ыразылыкъ къагъытла бла да. Алай бла «Юйретиучю-2019» Битеуроссей конкурсну регион даражалы кезиуюнде Къашхатауну «Тейри къылыч» сабий садыны юйретиучюсю Гуппойланы Асият хорлагъанды. Аны уа Сергей Александрович, энчи саугъалап, диплом эмда 20 минг сом ахча берип, жетишим тежегенди.
Ол кюн белгиленнгенлени санында бизни къызла аслам болгъанлары къууандыргъанды. Ол тизмеде сагъынылгъан садикни директору Къадырланы Лариса, Кёнделенден Отарланы Халимат, Огъары Малкъардан Забакъланы Асият, Тырныаууздан Элеккуланы Наталья, Звёздный посёлкадан Газаланы Альбина бла Аккайланы Жаннета, Нальчикден Сарбашланы Зухура, башхала да болгъандыла.
Эсгерте кетейик, жыл сайын бир энчи район быллай байрамгъа кёрмюч къураучуду. Бу жол а аны Зольск районну мектепге дери окъутхан бёлюмлерини келечилери хазырлагъандыла.
Ингирни концерт программасы да бай эди. Профессионал байрамлары бла ары келгенлени жырчыла Жаникаланы Элдар, Хусен Шалов, Азамат Цавкилов, КъМКъУ-ну «Каллисто» эмда «Амикс» къауумлары, бирсиле да алгъышлагъандыла.