Кёп болмай «Прохладненская» биригиуню кёрмюч комплексинде алтынчы кере «Прохладненская ярмарка -2019» деген кёрмюч бардырылгъанды. Мында битимчиликде, терек бахчачылыкъда, малчылыкъда хайырланылгъан эл мюлк техниканы, малланы, юй къанатлыланы, мирзеу урлукъланы, терекчиклени тюрлю-тюрлюлери бла шагъырейленирге онг болгъанды.
Анга КъМР-ни Правительствосуну Председателини биринчи орунбасары, эл мюлк министри Сергей Говоров, КъМР-ни промышленность эмда сатыу-алыу палатасыны таматасы Хасан Гукетлов, Прохладна муниципал районну администрациясыны башчысы Андрей Журавлёв, Прохладна шахар округну администрациясыны башчысы Игорь Тараев эм «Прохладна» биригиуню таматасы Владимир Дешев къатышхандыла.
Бу жол ярмаркада эл мюлкде уруннганланы эмда аны башха бёлюмлеринде къармашханланы да сейирлерин бурурча кёп жангычылыкъла болгъандыла. Анга къараргъа, Къабарты-Малкъарны келечилеринден сора да, Дагъыстандан, Шимал Осетиядан, Чеченден эм Ставрополь крайдан да кёпле келгендиле.
Быйыл анга Москвадан, Краснодар, Ставрополь, Пермь крайладан, Ростов, Киров, Воронеж областьладан эм Къабарты-Малкъардан эллиден аслам компания къатышханды. Аланы санында «Нью-Тон», «АгроМашТрейд», «Сармат», «БДТ-Агро», «Большая земля» биригиулени, «МТЗ-Ставрополь» сатыу-алыу юйню, «HARVEST» суу сугъаргъан машинала чыгъаргъан заводну эмда башхаланы сагъыныргъа боллукъду.
Андан сора да, мында къумалы атла, къойла, эчкиле, баппушла, къазла да кёргюзтюлгендиле. Жемиш, наныкъ терекчикле, урлукъла, ветеринар препаратла эм башха затла да кимни да сейирин бурдурурча эдиле.