26 сентября, 2019 - 07:38
Сочиде бу кюнледе бардырылгъан «Вся Россия – 2019» форумуну майданында КъМР-ни Журналистлерини союзуну бла Монголияны Журналистлерини конфедерацияларыны араларында байламлыкъда ишлерге деген келишимге къол салыннганды. Документни бизни республиканы сагъынылгъан биригиуюню таматасы Шауаланы Разият бла конфедерацияны оноучусуну орунбасары Зулькафил Маулет къабыл кёргендиле.
Анга кёре эки регионну СМИ-лерини араларында информация бла алышыныула,эки организацияны да «бирикген позициялары болгъан» темаланы бла болумланы ачыкълагъанда бир бирге билеклик этиу тамамланырыкъды. Шауаланы Разият билдиргенича, документге кёре журналист делегацияла бир бирлерине къонакъгъа бараллыкъдыла, пресс-турла, бирлешген семинарла, курсла къураллыкъдыла. Ол, аны оюмуна кёре, журналистлени кёз къарамларын кенгертирге, монголлу коллегаларыны сынамларыны юсюнден билирге эмда аны кеслерини ишлеринде хайырланыргъа онг берликди.
КъМР-ни Журналистлерини союзуну правленини таматасы Зулькафил Маулетге белгили россейли поэт Къулийланы Къайсынны китабын саугъалагъанды. Ол да кесини жанындан бизни организациягъа ыспас этип, ыразылыгъын билдиргенди.
Мындан арысында республиканы журналистлери бла байламлыкъда ишлерге ыразылыкъларын Чечен Республиканы, Север Осетия-Аланияны, Татарстанны, Тываны, Дагъыстанны келечилери да билдиргендиле.