КъБКъУ-м Iуащхьэмахуэ лъапэ щиIэ еджапIэ-щIэныгъэ IуэхущIапIэм иджыблагъэ щызэхашащ «Августёнок» щIыналъэ зэхуаку щIалэгъуалэ лагерыр. А лэжьыгъэр къызэригъэпэщащ еджапIэ нэхъыщхьэм и студсоветхэм я зэгухьэныгъэм. Абы къызэщIиубыдащ зэхуэзэ хьэлэмэтхэр, пшыхь гъэщIэгъуэнхэр, лекцэ купщIафIэхэр.
«Августёнок»-м щыIэхэм мы махуэхэм я хьэщIащ КъБКъУ-м щIэныгъэ-къэхутэныгъэ лэжьыгъэмкIэ и проректор, химие щIэныгъэхэм я доктор, профессор Малкандуев Юсуф. Лагерым щекIуэкI Iуэхугъуэхэмрэ абы и мыгъэрей зэхуэсым и мурадхэмрэ къалэнхэмрэ хьэщIэр щыгъуазэ хуащIащ КъБКъУ-м ЩIалэгъуалэ политикэмрэ гъэсэныгъэ лэжьыгъэмкIэ и управленэм и унафэщIым и къуэдзэ Жабеловэ Гюльнарэрэ лагерым и унафэщI, КъБКъУ-м и Студсоветым и пашэ Аулъэ Ахьмэдрэ. Абыхэм зэрыжаIамкIэ, «Августёнок»-р 2009 гъэ лъандэрэ мэлажьэри, зы илъэси къэмынэу щокIуэкI студент активым я еджэныгъэхэр. Лагерым щыIэ лекцэхэр, зэпеуэхэр, тренингхэр, семинархэр, мастер-классхэр хуэгъэпсащ щIалэгъуалэм ябгъэдэлъ зэфIэкIым хэгъэхъуэным, студент самоуправленэр гъэлэжьэнымкIэ хабзэхэм ахэр щыгъуазэ хуэщIыным. КъинэмыщIауэ, студентхэм утыку ирахьэ я творческэ зэфIэкIхэр, загъэпсэху, я узыншагъэри ирагъэфIакIуэ.
Апхуэдиз лэжьыгъэ щызэфIах гъэмахуэ лагерыр студент активым я зэфIэкIхэм щыхагъахъуэ зэхуэсхэм я нэхъыфIу хуэфащэ дыдэу къилъытащ ЩIалэгъуалэм я урысейпсо зэгухьэныгъэм.
Студент самоуправленэм нэхъри зиужьынымкIэ лагерым мыхьэнэшхуэ зэриIэр къыхигъэщу, Малкандуевым жиIащ къэралыр щIалэгъуалэ жыджэрхэм куэдкIэ зэращыгугъыр. Апхуэдэу хьэщIэ лъапIэм студентхэр къыхуриджащ, щIэныгъэ куу зэрызрагъэгъуэтым къыдэкIуэу, жылагъуэ гъащIэм хуаIэ набдзэгубдзаплъагъэм адэкIи хагъэхъуэну, республикэм и къэкIуэнумкIэ жэуаплыныгъэр зыхащIэу Iуэху зэрахьэну.
- Ди университетым иджыпсту щекIуэкI зэхъуэкIыныгъэфIхэр хуэгъэпсащ абы «щIыналъэпсо еджапIэ нэхъыщхьэ» статусыр къыхуагъэфэщэным, - жиIащ Малкандуевым. - Абы и лъэныкъуэкIи мыхьэнэшхуэ идот мыпхуэдэ щIалэгъуалэ гъэма-хуэ лагерхэм я зыужьыныгъэм.
Проректорыр къытеувыIащ КъБКъУ-м щекIуэкI щIэныгъэ-къэхутэныгъэ лэжьыгъэщIэхэм, грант къызыпэкIуэ программэхэм. ИужькIэ абы студентхэм я упщIэ зэмылIэужьыгъуэхэм жэуап нэсхэр яритащ. Ахэр епхат еджапIэ нэхъыщхьэм и лэжьэкIэр зэребгъэфIакIуэ хъуну щIыкIэхэм, студсоветхэм яIэ хуитыныгъэхэм.
- ИпэжыпIэкIэ жыпIэнурамэ, сэ фэ, зи щIалэгъуэхэм, сынывохъуапсэ икIи сыфхуогуфIэ. Сэ нобэ нэрылъагъу дыдэ сщыхъуащ фхэлъ жыджэрагъымрэ фи мурадхэмрэ гъунапкъэ зэрамыIэр. Мы зэманым ди университетым бгъэдэлъ мылъку-техникэ зэфIэкIыр абыкIэ сэбэпышхуэ къыфхуэхъунущ, дэ апхуэдэ Iэмалхэр пщIыхьэпIэуи тлъэгъуакъым, - захуигъэзащ студентхэм Малкандуевым. - А псоми ехъулIэныгъэфIхэр къытхуихьащ. Къапщтэмэ, Урысей Федерацэм и еджапIэ нэхъыщхьэ 288-м ящыщу КъБКъУ-м 66-нэ увыпIэр щиIыгъщ егъэджэныгъэм и фIагъымкIэ, щекIуэкI щIэныгъэ лэжьыгъэмкIэ ар щытщ 50-нэ увыпIэм, инновацэ технологиехэр лэжьыгъэм къызэрыщагъэсэбэпымкIэ университетыр уващ 45-нэ увыпIэм. Апхуэ-дэ Iэмалхэр зиIэ фэ IэщIагъэлI щыпкъэхэр къыфхэкIын, фызыпэрыт дэтхэнэ Iуэхугъуэхэри фыкъыхэжаныкIыу зэфIэфхын хуейщ.
ЗэIущIэр иухащ хьэщIэри бысымхэри зэхуэарэ-зыуэ, зым адрейм фIыщIэ хуищIу. Шэч хэлъкъым апхуэдэ зэхуэзэхэр студентхэми КъБКъУ-м и унафэщIхэми я дежкIэ гукъинэж зэрыхъунум.
