Бу кюнледе КъМКъУ-да «Сабийле-миллет байлыкъ» деген ат бла экинчи регионла аралы илму-практика конференция ишин бардыргъанды. Форумгъа Москвадан, Санкт-Петербургдан, Ставрополь крайдан, Чечен Республикадан, Шимал Осетиядан, Къабарты-Малкъардан да юч жюзден аслам педиатр, неонатолог, пульманолог эмда битеулю практиканы врачлары къатышхандыла. Ала саулукъну сакълауда эмда ёсюп келген тёлюге медицина болушлукъ этиуде билимни, усталыкъны даражасын ёсдюрюуню юсюнден кенгешгендиле. Жыйылгъанланы конференцияны ачылыуу бла къонакъбай университетни сабий ауруула эмда аначылыкъ кафедрасыны башчысы, Россейни педиатрларыны союзуну бизни республикада бёлюмюню таматасы Жетишланы Рашит, КъМР-ни Саулукъ сакълау министерствосуну сабийлеге эмда аналагъа медицина болушлукъну къурагъан бёлюмюню начальниги Юлия Шогенова, Педиатрланы союзуну Санкт-Петербургда регион бёлюмюню вице-президенти, Россейни Минздравыны СЗФО-да штатда болмагъан баш педиатры Елена Булатова алгъышлагъандыла. Къабарты-Малкъарны саулукъ сакълау министри Марат Хубиевге, КъМКъУ-ну ректору Юрий Альтудовха бу тюбешиуню къураугъа къошхан юлюшлери ючюн ыразылыкъларын билдиргендиле.  Форумну пленар бёлюмюнде уа Елена Булатова «РФ-ни саулукъ сакълауунда айныуну жоллары. Педиатрия ызла» деген темагъа доклад бла сёлешгенди. Ол «Саулукъ сакълау» миллет проектни «Медицина организацияны жангы моделин къурау», «Биринчи – медицина-санитар болушлукъну системасын айнытыу», «Медицина организацияланы квалификациялы кадрла бла жалчытыу» дегенча эм бирси подпрограммаларын жашауда бардырыу сынамны юсюнден айтханды.
Андан сора жыйылгъанла Жетиш улуну сапыран аурууну диагностикасы, аны бла байламлы болушлукъну юсюнден докладына тынгылагъандыла. Дагъыда «Дифференциальная диагностика синдрома патологической дентации и острых респираторных инфекций у малышей» деген мастер-классха къатышхандыла. Аны уа Россейни Пирогов атлы медицина университетини факультет педиатрия кафедрасыны профессору Тамара Казюкова бардыргъанды. Конференцияны биринчи кюнюнде врач-педиатрны усталыгъын ёсдюрюуню школу да ишлегенди. Санкт-Петербургну къырал педиатрия медицина университетини, Россейни федерал медицина-биология агентствосуну Инфекция аурууланы сабий илму-клиника арасыны эмда Ставропольну къырал медицина университетини специалистлери сабий инфекциялагъа багъыуда магъаналы проблемалагъа жораланнган бир ненча мастер-класс кёргюзтгендиле. Экинчи кюн а Елена Булатованы башчылыгъы бла форумда «Санкт-Петербургну медицина школу – Россейни врачларына» эмда «Бирге» деген билим бериу, социал проектлени жашауда бардырыугъа эс бурулгъанды. Андан сора да, педиатрлагъа усталыкъларын тохтаусуз ёсдюрюуню къалай бардырыргъа боллугъуну юлгюсю жарашдырылгъанды. Конференциягъа къатышханланы барысы да квалификацияларын ёсдюргенлерине шагъатлыкъ этген, код бла белгиленнген сертификатла алгъандыла.