РусГидро компанияны Къабарты-Малкъарда бёлюмюню келечилери, #ВместеЯрче деген, кеси да энергияны аяу эмда экология жаны бла бардырылгъан Битеуроссей фестивальны чеклеринде Зарагиж ГЭС-де «Ачыкъ эшиклени кюнюн» бардыргъандыла. Бу ишге Къабарты-Малкъар къырал аграр университетни энергия бла жалчытыу факультетини экинчи курсуну студентлери да къатышхандыла, деп билдиргендиле бёлюмню пресс-службасындан.
Экскурсияны кезиуюнде жаш адамла электрокюч къалай чыгъарылгъанын кёргендиле, гидроэлектростанцияны иши бла шагъырейленнгендиле, шёндюгю дунияда энергетиканы магъаналылыгъына тюшюннгендиле. Компанияны специалистлери уа алагъа энергияны, тёгерекдеги къудуретни да аяргъа кереклисини юсюнден хапарлагъандыла.
Быллай станцияла сууда ишлегенлери себепли, токну чыгъарыуда кюйдюрюлюучю ресурсла хайырланылмайдыла. Ол а сагъынылгъан борчланы тамамлаугъа иги себеплик этгенин да ангылатхандыла. Жыйылыуну ахырында студентле, фестивальны белгисин къолларына алып, станцияны аллында суратха тюшгендиле.
Бу акцияны РусГидро 2016 жылда бардырып башлагъанды. Аны чеклеринде компанияны бёлюмлери ишлеген регионлада тюрлю-тюрлю экскурсияла, конкурсла, тематикалы дерсле къураладыла, энергомарафонла эмда спорт эришиуле ётедиле. Аланы кезиулеринде баш магъана энергияны аяугъа эмда тийишли технологиялагъа бериледи.