КъМР-ни Парламентини 6-чы чакъырылыууну биринчи жыйылыуу экиге бёлюннгенди. 19 сентябрьде законла чыгъарыучу органны спикери бла аны орунбасарлары айырылгъан эселе, тюнене уа комитетлени къауумлары эмда аланы башчылары сайланнгандыла.
Жыйылыуну спикер Татьяна Егорова бардыргъанды. Аны ишине РФ-ни Къырал Думасыны депутаты Геккиланы Заур, Жамауат палатаны башчысы Хазратали Бердов, Адамны экинликлери жаны бла уполномоченный Зумакъулланы Борис, Конституциялы сюдню таматасы Геляхланы Абдуллах, республиканы прокурору Николай Хабаров эм башхала къатышхандыла.
Биринчиден, РФ-ни Федерация Советинде республиканы законла чыгъарыучу органыны келечиси сайланнганды. Аны кандидатурасын «Единая Россияны» фракциясы кёргюзтгенди. Аны башчысы Михаил Афашаговну айтханына кёре, депутатла бирча Улбашланы Мухарбий жанлы къол кётюргендиле. «Аны кандидатурасын партияны Генеральный совети да къабыл этгенди»,-деп къошханды ол.
Башха фракцияла кеслерини келечилерин кёргюзтмей, Улбаш улуну профессионал, адамлыкъ шартларын белгилеп, ол республиканы сейирлерин сакълагъанын чертип, аны жанлы болгъанларын айтхандыла.
Улбашланы Мухарбий, коллегаларына ыразылыгъын билдире, къырал салгъан борчланы тамамлауда билимин, профессионал сынауун да аямазгъа айтханды. «КъМР-ни Парламентини депутатыны статусуну юсюнден» законнга тийишлиликде бу къуллукъгъа сайланнганны полномочиялары болжалдан алгъа тохтатыладыла.
Ол кюн дагъыда бир депутат мандат эркин болгъанды – Светлана Самохваловадан аны юсюнден заявление келгенди. Депутатла аны да къабыл кёргендиле.
Ызы бла комитетлени къауумларын, аланы башчыларын айырыугъа киришгендиле. Татьяна Егорова КъМР-ни Конституциясына тийишлиликде Парламентде Миллетлени ишлери жаны бла комитет къуралгъанын, анга республикада жашагъан халкъланы келечилери киргенлерин эсгертгенди. Анга башчылыкъны уа къабарты, таулу эм орус миллетли депутатла тенг халда этедиле. Комитетни келечилери жыйылыуларында бу къуллукъгъа Рахайланы Анатолийни, Мухамед Кудалиевни эм Владимир Бердюжаны кёргюзтгендиле. Депутатла, къол кётюрюп, аланы тюзге санагъандыла.
Ызы бла профильли комитетлени къауумлары эм аланы башчылары бла орунбасарлары айырылгъандыла. Татьяна Егорова жыйылыуну биринчи бёлюмюнден сора депутатладан къайсы комитетге кирирге сюйгенлерини юслеринден заявленияла келгенлерин, аланы къауумлары къуралгъанларын билдиргенди.
Фракцияла бирге бардырылгъан жыйылыуларында комитетлени башчыларына, аланы орунбасарларына кандидатланы кёргюзтгендиле. Татьяна Егорованы айтханына кёре, комитетлени башчылары Парламентде ишлерин профессионал халда бардырлыкъдыла эмда законла чыгъарыучу органны президиумуна кирликдиле.
Алай бла биринчи Законодательство эм жер-жерли самоуправленияны соруулары жаны бла комитетни къаууму белгиленнгенди. Аны башчысына Борис Мальбахов, орунбасарына уа Касболат Дзамихов тийишли кёрюлгендиле. Жамауат къоркъуусузлукъ эм коррупциягъа къажау комитетге таматалыкъны Михаил Кривко этерикди, аны экинчисине Ахмед Есенкулов сайланнганды.
Бюджет, налогла эм финанс рынокла жаны бла комитетни таматасына Михаил Афашагов, орунбасарына уа Насталаны Алисолтан айырылгъандыла. Экономика политика, инновация айнытыу эм предпринимательство комитетге башчылыкъны Заур Апшев этерикди, экинчисине Алексей Войтов салыннганды. Аграр соруула, табийгъатны хайырланыу, экология, тёгерекдеги къудуретни сакълау жаны бла комитетге Артур Текушев башчылыкъ этерикди, орунбасары Сафарби Шхагапсоев болгъанды.
Къурулуш, жашау журт-коммунал мюлк эм отлукъ-энергетика комплекс жаны бла комитетни таматасына Байдаланы Салих, орунбасарына Адальби Тлеужев тийишли кёрюлгендиле. Промышленность, транспорт, связь эм жол мюлк комитетни башчысы Руслан Токов, аны орунбасары Олег Залин болгъандыла. Билим бериу, илму эм жаш тёлюню ишлери жаны бал комитетге башчылыкъны энди Нина Емузова этерикди, экинчисине Ольга Коротких тийишли кёрюлгенди.
Урунуу, социал политика эм саулукъ сакълау комитетни башчысы Хусейн Кажаров болгъанды, экинчисине Владимир Безгодько сайланнганды. Культура, граждан обществону институтларын айнытыу эм информация политика жаны бла комитетге башчылыкъны Борис Паштов этерикди, аны экинчиси Фатимат Амшокова болгъанды. Физкультура, спорт эм туризм комитетни башчысына Арсен Барагунов, орунбасарына Рустам Калибатов айырылгъандыла.
Татьяна Егорова Контроль эм регламент жаны бла комитетни башчысыны кандидатурасы алыкъа белгиленмегенин, энтта сёлешиуле бардырылгъанларын билдиргенди, болсада орунбасарына уа Мурадин Карданов сайланнганды.
Спикер билдиргенича, профильли комитетлени башчыларыны орунбасарлары Сафарби Шхагапсоев, Владимир Безгодько, Ахмед Есенкулов Парламентни президиумуна кийириледиле эмда ишлерин профессионал халда бардырлыкъдыла.
Жыйылыуда Парламентни депутатларыны файдаларыны эм ырысхыларыны юслеринден шартланы тинтиу жаны бла комиссияны оноучу къаууму да сайланнганды. Анга таматалыкъны спикерни орунбасары Жанатайланы Салим этерикди.
Шимал-Кавказ федерал округда парламент ассоциацияда КъМР-ни законла чыгъарыучу органындан келечиле да сайланнгандыла. Татьяна Борисовна бу кенгешчи органнга округну битеу субъектлери да киргенлерин, анда 7 комитет болгъанын белгилегенди.
Жыйылыуну ахырында Татьяна Борисовна Федерация Советден, къыралны субъектлеринде законла чыгъарыучу органладан республиканы Парламентини жангы къаууму ишлеп башлагъаны бла алгъышлаула келгенлерин билдиргенди. Дагъыда ол, 3 октябрьде депутатла КъМР-ни Башчысын сайларыкъларын эсгертип, айырыугъа тынгылы хазырланыргъа чакъыргъанды.
