Адыгланы (черкеслилени) кюнюн белгилеуню аллында, Тырныауузда Абайланы Солтанбек атлы искусстволаны сабий школунда «Мы силою родной земли сильны» деген ат бла къууанчлы жыйылыу озгъанды. Белгили датаны байрамына Элбрус районну эмда сагъынылгъан шахарны администрацияларыны, «Адыгэ Хасэ» жамауат организацияны келечилери, учрежденияланы, предприятияланы, биригиулени таматалары бла алада ишлегенле эмда районну жамауаты келгендиле.
Сагъынылгъан районну администрациясыны башчысы Залийханланы Къаншаубий, къонакъланы алгъышлап, анда аслам этносну келечиси кёп жылланы ичинде бир бирлери бла жарашыулукъда, мамырлыкъда жашап келгенлерин белгилегенди. Малкъарлыланы бла къабартылыланы келечилери бирге иги кесек юйюр къурагъанларын, алай бла арада жууукълукъ жюрютгенле аслам болгъанларын, ала сатыу-алыуну, саулукъ сакълауну, билим бериуню, бирси социал магъаналы сфераланы айнытыугъа къошхан юлюшню юсюнден да айтханды.
Къууанчлы жыйылыуну кезиуюнде Къулийланы Къайсын атлы Маданият юйге эмда огъарыда сагъынылгъан искусстволаны сабий мектебине жюрюгенле бай концерт программа кёргюзтгендиле.