Нальчикде жашагъан эгешчиклени - Бёзюланы Лейланы, Жамиляны, Аминаны хунерлиликлерин кёпле биледиле эм жаратадыла. Гитче болгъанларына да къарамай, жетишимлери бла ата-аналарын, жууукъларын, устазларын да къууандыргъанлай келедиле. Алгъаракълада биз ала Сочиде «Мисс мира» брендни мурдорунда «Горный бриллиант» коллекцияны кёргюзтюуге къатышып, сахнагъа миллет жыйрыкълада, кямарлада чыкъгъанларын билдирген эдик.
Кёп болмай а ала ючюсю да Кърымда быйыл онунчу кере къуралгъан «Алтын Майдан» халкъла аралы фестивальгъа эмда «Атлеш» конкурсха баргъандыла. «Шагди» халкъ ансамбльни къауумунда сагъынылгъан эки жерде да тепсегендиле. Ансамбль а башха-башха номинациялада эки биринчи, анча да экинчи жерге тийишли болгъанды.
Эсгерте кетейик, «Шагди» бу жол фестивальгъа экинчи кере чакъырылгъанды. Былтыр анда Гран прини алгъанды. Лейла бу коллективде бешжыллыгъындан (анга алыкъа 10 жыл толгъанды), Жамиля-тёртжыллыгъындан (анга 8 жыл толгъанды), ючжыллыкъ Аминачыкъ да быйылдан тепсеп башлагъандыла. Къызчыкъла, андан сора да, аны Москвада, Железноводскда, Стамбулда, Нальчикде сольный концертлерине къатышхандыла.
Тепсеуден сора да, аланы жыр айтыргъа барды хунерлери. Фестивальда барысы да жырлагъандыла. «Алтын Майданны» вокал конкурсунда эгешчикледен тунгучларына («Наш Кавказны» айтханды) бла ортанчыларына («Эльбрус красавецни» жырлагъанды) – ючюнчю, кичилерине уа («Мамочка») экинчи даражалы дипломла берилгендиле.
Белгилерге тийишлиди, Аминачыкъ бу эришиуге къатышханланы арасында эм гитче конкурсант болгъанды, жетишими ючюн дагъыда энчи саугъа алгъанды. Андан сора да, ала барысы да кесибизде къуралгъан «Нальчик-подкова счастья», «Эм иги ауазла» дегенледе ёз жыл санларында аслам кере алчыла болгъандыла. Республикадан тышына уа вокал жаны бла бу жол биринчи кере баргъандыла. Педагог Анна Пазованы студиясына жюрюп, анда юйренедиле.
Дагъыда Лейла бла Жамиля Розанна Твикежеваны «RT Models» модель школун айырмалы тауусхандыла. Кичилери алыкъа аны бошамагъан эсе да, эгешчиклерини биргелерине хар къайсы кёргюзтюуге да къатышып, кесин танытханды. Аланы Нальчикден тышында да шахарлада бардырылгъан тюрлю-тюрлю мода кёргюзтюулеге, жандауурлукъ концертлеге, фотосессиялагъа чакъыргъанлай турадыла. Жамиля «Моданы эмда фахмуну ариулугъу» сабий конкурсда «litteе miss Caucasus» даражаны алгъанды.
Сахнада кеслерин ариу жюрюте, анга къууат сала билгенлеринден сора да, ала накъышла салыугъа, сурат ишлеуге, ингилиз тилге, къобуз согъаргъа, дагъыда башха затлагъа тюшюнюрге сюйюп, художестволу эмда музыка школлагъа, бирси студиялагъа жюрюйдюле. Лейла дизайнер усталыкъны жаратады. Бирсиле уа алыкъа сайлаудадыла. Алай эсе да, маданиятны кёллери бла сюйгенлерин а ачыкълайдыла.
Эгешчиклени кезиулю жетишимлерине биз да къууаннганбыз. Ала алыкъа сабий эселе да, хунерлерин айнытыргъа, ёсдюрюрге эринмейдиле неда эрикмейдиле. Ахшы муратларына итиннгенлерин, аны ючюн а арымай-талмай кюрешгенлерин бир бири ызларындан болдургъан жетишимлери ачыкълайдыла. Аны бла бирге уа аланы ол ызда юйретген ата-ананы хурметлейбиз эм мындан арысында бютюн уллу, даражалы бийикликле тежейбиз.
