Кёп болмай Къабарты-Малкъар къырал университетни право, экономика эм финансла институтуну студенти Муртазланы Лана АБШ-ны Массачусетс штатыны ара шахары Бостонда «Women2Women international Leadership Conference» деген халкъла аралы конференциягъа къошулгъанды.
Анга къатышыргъа сюйгенлерин 45 къыралдан 1000 адам билдиргендиле. Болсада аны ючюн къаты сайлау болгъанды - берилген ишлени тынгылы тамамларгъа эм ингилиз тилде Скайп бла собеседованияны да ётерге керек эди. Алай бла, эсеплеге кёре, конференциягъа 140 адам сайланнгандыла, ол санда Россейни Курск, Уфа, Новосибирск эм Нальчик шахарларындан тёрт къыз.
Лана тутхан ишин эбине жетдиргенледенди. Америкагъа да кесини таукеллиги бла баралгъанды. Ол ингилиз тилни гитчелигинден биледи, бусагъатда французча да юйрене турады. Къыз бир ненча кере шахар эм республикалы олимпиадалада хорлагъанды. КъМКъУ-ну «Экономика» бёлюмюнде окъуй тургъанлай тилле бла къаты кюрешеди, Интернет бла белгили америкалы университетле бардыргъан курслагъа къатышады.
Конференцияда адамны къадарыны, Интернетни магъанасыны, тиширыу предпринимательлени, тиширыуланы эркинликлерини эмда башха затланы юсюнден спикерле - Гарвардны, Симмонсну эм Бостонну университетлерини преподавательери, белгили шоуменле эм конгрессменле сёлешгендиле.
- АБШ-да асламысында Симмонс бла Гарвард университетледе ишлегенбиз. Кертисин айтханда, экинчисин бек жаратханма. Мында белгили преподавательле Сьюзан Хакли бла Виктория Бадсон эм Бостонда биринчи афроамериканлы телеведущий Лиз Волкер окъугъан лекцияла бек сейир эдиле,- дейди Лана.
Конференцияда къауумланы ишине аслам эс бёлюннгенди. Ол себепден форумну аллында окъуна биз командалагъа юлешинген эдик. Ахырында уа Массачусетсни правительствосуну юйюнде сенотор Эдвард Маркини эмда башхаланы проектлерибиз бла шагъырей этгенбиз.
Саулай айтханда, конференцияны хайырындан Американы университелеринде болалгъаныма къууанама. Ол мени дуниягъа кёз къарамымы кенгертирге, сынамымы ёсдюрюрге да ахшы себеплик этгенди. Мында кёп сейир адам бла танышханма, жангы шуёхла да тапханма,- дейди жерлешибиз.