17 сентября, 2019 - 06:43
Иужьрей лъэхъэнэм, хабзэ хъуауэ, щIэныгъэм и унэтIыныгъэ зэмылIэужьыгъуэхэмкIэ дэнэкIи щрагъэкIуэкI къэпщытэныгъэхэр. КъБКъУ-м тхьэмахуэ блэкIам и кIэухым къыщызэрагъэпэща апхуэдэ Iуэхугъуэхэм ящыщщ ИТ-диктантыр, Урысейпсо егъэджэныгъэ акцэр. Университетым и пресс-IэнатIэм и унафэщI Сенич Михаил къызэрыджиIамкIэ, еджапIэ нэхъыщхьэм и егъэджакIуэхэми студентхэми хъыбарегъащIэ технологиехэмкIэ ябгъэдэлъ щIэныгъэр здынэсыр къэзыщIэну гукъыдэж зиIэ куэд къахэкIащ.
Псори зэхэту къапщтэмэ, къэпщытэныгъэхэм хэтащ КъБКъУ-м и егъэджакIуэрэ студенту цIыху 500-м щIигъу. Абыхэм ящыщу 200-м диктантыр щатхащ университетым и «Точка кипения» (УТК) IэнатIэм, адрейхэм лэжьыгъэхэр щагъэзэщIащ лекцэхэм хуэщIа аудиторэ инхэм. Я гугъуагъкIэ зэмылIэужьыгъуэ тест лэжьыгъэ 32-рэ ящIыжащ абыхэм. Тестхэм яхэтт гушыIэ хэлъу зэхагъэувахэри, компьютерым узэрыхуэшыуэр къозыгъащIэхэри, Интернетым иIэ Iэмал гъунапкъэншэхэм ящыщу уи къэухьым къызэщIиубыдэхэр нэрылъагъу зыщIхэ-ри.
Университетым диктантыр щызытхахэм нэмыщI, къэпщытэныгъэхэм хэтащ ар онлайн щытыкIэм иту зыгъэзэщIахэри. Лэжьыгъэхэр псори къызэщIакъуэжа нэужь, Iуэхум хэта дэтхэнэми сертификат иратащ, ИТ-диктантыр зэритхам щыхьэт техъуэу. Нэхъ иужьыIуэкIэ наIуэ къащIынущ а къэпщытэныгъэм кърикIуахэр. Лэжьыгъэхэм ехъулIэныгъэкIэ пэлъэщахэм гулъытэ хэха хуащIынущ. Абыхэм саугъэтхэр иратынущ.
Фигу къэдгъэкIыжынщи, ИТ-диктантыр нэгъабэ япэ дыдэу Тюмень щIыналъэм щрагъэкIуэкIащ. Мы гъэм а акцэр даIыгъащ къалэ 19-м щыIэ еджапIэ нэхъыщхьэхэм я УТК-хэм. Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетри, ди гуапэ зэрыхъущи, IуэхугъуэщIэр къыщыщта а еджапIэ пэрытхэм ящыщщ.