Бараз кюн Тюркню Анкара шахарында ТЮРКСОЙ халкъла аралы организация бла Кечиорен районну администрациясы къурап малкъар халкъны закий поэти Къулийланы Къайсынны атын жюрютюрюк парк ачылгъанды. Ол къууанчлы ишге ТЮРКСОЙНУ таматасы Дюсен Касаинов, «Минги- Тау» журналны баш редактору Додуланы Аскер, суратчы эм скульптор Ахматланы Леуан, Къайсынны жашы Къулийланы Азамат эм белгили тилманч, Башкъортостан Республиканы Тюркде келечиси Мызыланы Къаншаубий къатышхандыла.
Бу кюннге деп скульптор Ахматланы Леуаннга Къайсынны бюстюн хазырларгъа деп буюрулгъан эди. Фахмулу суратчы анга ыразылыгъын билдирип, айтылгъан кезиуге ишни тындыргъанды. Ол кюн паркда бюстну къууанчлы халда ачхандыла. Дюсен Касаинов, Ахмат улуна ыразылыгъын билдирип, саугъалагъан да этгенди.
Кечиорен Анкараны бек кёп (1 миллион) адам жашагъан районуна угъай да, саулай къыралда да адам саны бла биринчи жердеди. Бизни Къайсынны атын жюрютюрюк парк да энчи анда орналгъаны къууандырады. Жыйылыудан сора ары келгенле барысы да дуниягъа белгили поэтни эсгертмесини аллында суратха тюшгендиле.