Кёп болмай Шимал Осетияны къырал университетинде «Россей –ахшы онгланы къыралы» деген проектни чеклеринде «Цифралы айныу» битеуроссей конкурсну регион кесеги ётгенди. Анга программирование, дизайн эм управление бёлюмлени специалистлери къатышхандыла.
Жарым финалда Шимал Осетияны бла Къабарты-Малкъарны командалары тюбешгендиле. Алагъа берилген ишлени темалары миллет проектле бла байламлы эдиле. Сёз ючюн, владикавказчыла «Къырал управление» эм «Саулукъ сакълау» номинациялада эришгендиле.
- Бюгюн Владикавказда конкурсну регион кесегине къатышханлагъа ыразылыгъымы билдирирге сюеме. Къысха заманны ичинде сиз сейир, къыйматлы проектлени жарашдырыргъа къолугъуздан келлигин кёргюзтгенсиз. Эсеплеге кёре уа, финалгъа Шимал Осетиядан бла Къабарты-Малкъардан беш команда чыкъгъандыла. Энди ала кючлерин 27 сентябрьде Казаньда сынарыкъдыла,- дегенди конкурсну координатору Артём Попов.
Эсге сала айтсакъ, конкурсну эксперт советини санына къырал власть органла бла «Росатом», «МегаФон», «МТС», «Mail.ru Group» дегенча уллу компанияла киредиле. Финалгъа къатышырыкъ эм иги къауумланы да ала айырадыла.
Саулай айтханда, эришиулени регион кесеклери къыралны эки жыйырма шахарында ётгендиле. Конкурс быйыл 3 апрельде башланнганды, анга регионладан 66 474 заявка берилген эди. Аны баш магъанасы цифралы экономикагъа жангы кадрла табаргъады.
Конкурсантла кеслерини бизнеслерин башларгъа, уллу компанияланы биринде урунургъа, 500 миллион сом къытаргъа эмда проектлерин бардырыргъа Инновациялагъа себеплик этген фонддан грант алыргъа онглары барды. Андан сора да, коммерциялы болмагъан «Россей – ахшы онгланы къыралы» организацияны арасында энчи программала бла билимлерин ёсдюрюрге боллукъдула.
