Битимлени тирликлилигин кётюрюуге къайгъыра.

Кёп болмай КъМР-ни Эл мюлк министерствосуну башламчылыгъы бла Прохладна бла Май районлада  агропромышленный комплекследе инвестициялы проектле жашауда къалай бардырылгъанларына къаралгъанды. Ишчи къауумгъа КъМР-ни эл мюлк министрини орунбасары Мачраил Шетов, «Каббалкмелиоводхозну», эл мюлк организацияланы келечилери, элли-фермер мюлклени, кооперативлени таматалары, арендаторла эмда башхала къатышхандыла.
Ол кюн Къарагачдан «Байкал», Солдатская элден «Холам» фирмала бла «Заптиева Х.М.» фермер мюлк, Винаградноеден «Заря» предприятие, Лесноеден «Жамбеев З.З.» фермер мюлк, Котляревскаядан «Зелёная компания» агрофирма сугъарыу ишлери бла шагъырей этгендиле. Прохладна райондан «Байкал» эл мюлк кооперативни таматасы Каральби Штымов ёзенледе сабанлагъа суу салмай иги тирлик алыр амал болмагъанын чертгенди.
- Бизни кооператив минг гектар чакълы жерде мирзеу эм башха битимле ёсдюреди. Эки жыл мындан алгъа инвестициялы проектни чеклеринде республикада биринчи болуп жауун халда сугъарыу машиналаны хайырланып тебирегенбиз. Анга Эл мюлк министерство да иги болушханды. Аны бла бирге «Россейни мелиоратив комплексин айнытыу» деген ведомстволу программа бла «Агропромышленный комплексни экспорт онгларын толу хайырланыу» миллет проект да ахшы себеплик этгенди.
Быйыл сугъарылгъан сабанларыбызны хар гектарындан 50 центнер мирзеу алгъанбыз, башха жерледе уа 16-19 центнерден кёп чыкъмагъанды. Быллай амалны хайырланмасакъ, быйыл нартюхсюз къалыргъа окъуна боллукъ эдик. Энди уа аны бир гектардан 100 центнер чакълы алырбыз деп умут этебиз. Андан тышында, мелиорацияны хайыры бла жылгъа эки кере тирлик жыйыллыкъ жерлерибиз да бардыла, - дейди Каральби Штымов.
Тюбешиуледе арендаторла жарсыуларын айтхандыла, ол санда жерни ортакъгъа алыуну юсюнден да. Республикада ол жети жылдан кёпге берилмейди. Алай жерчиликде къармашханнга мелиоратив ишлеге иги кесек ахча эм заман къоратыргъа тюшеди.
Айтыргъа, комплекс халда бир гектарны сугъарыр ючюн 8,5 миллион сом кетеди. Иш алай барса, бир ненча жылдан сагъынылгъан жерле тынгылы оборудованиялары бла бирге ахчаны кёбюрек бергенни къолуна тюшмезлеми, деп жарсыгъанла болгъандыла. Прахладна районну эл мюлк управлениясыны таматасы Сергей Голубничий, анга жууап бере, мелиорацияны айнытыугъа къоранчла этгенле бла районну администрациясы келишимни онтёрт жылгъа эм андан кёпге да созаргъа хазырды дегенди.
Жыйырма, элли, жюз гектар жерлери болгъан арендаторла уа къалай болсунла деген соруугъа уа Мачраил Шетов жууаплагъанды. Ортакъгъа уллу жер алмай къармашханла, бирлешип, эллеринде неда районларында мелиоратив системаланы айнытыргъа керекдиле.
Сёз ючюн, жыйырма, эки жыйырма гектар жерлери болгъанланы сугъарыу ишни тамамларгъа кючлери жетерикди. Жыл сайын жеринден бир угъай, эки кере кёп тирлик алыргъа сюйген а къоранчла этмей боллукъ тюйюлдю. Анга быллай башламчылыкъла ючюн къыралдан ахшы болушлукъ табаргъа боллугъу да кёллендирирге керекди.
КъМР-ни Эл мюлк министерствосуну битимчилик эм химизация жаны бла бёлюмюню таматасы Ирина Балкарова предпринимательлеге къырал программаланы юсюнден толуракъ айтханды. Ол санда  мелиорация бла байламлы пректлени бардыргъанлагъа къоранчларыны 60 процентин жабарча къырал эм регион бюджетледен ахча берилгенин да билдиргенди.

Магометланы Сулейман.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.