Быйыл сентябрьде Терк районда энтта да эки ясли ишлеп башларыкъды. Муниципалитетни жер-жерли администрациясындан билдиргенлерине кёре, бу объектлени къурулушу шёндю барады. Ала орта билим берген учрежденияланы мурдорунда къураллыкъдыла: Плановское элни 1-чи номерли школуну эмда биринчи номерли лицейини.
Объектлени къурулушу былтыр октябрь айны ахырында башланнган эди. Бар ишлени «Строй-Оптима» подряд организация бардырады. Аны специалистлери графикден таймай, къыш-жаз демей къармашадыла.
Бюгюнлюкге садиклени экисини да мекямлары хазырды. Алада сюртюу-бояу ишле тындырылгъандыла, оборудование орнатылгъанды, кеслери да инженер коммуникациялагъа къошулгъандыла. Арбазланы жашиллендириу, гитче архитектура затланы орнатыу жумушла да эбине жетдирилгендиле.
Саулай айтханда, хар яслини къурулушуна 26 миллион сом къоратыллыкъды. Кюзде уа алагъа битеу да 160 сабий жюрюп тебирерикди.
Дагъыда бу жайны ахырына дери Терек шахарда 140 жерли садикни эмда Жангы Малкъарда бла Хамидие элледе 60 эм 40 сабий жюрюрча яслилени къурулушу башланырыкъды.
