Энди Къабарты-Малкъарны «кюмюш» волонтёрларыны кеслерини энчи аралары барды. Ол 16 июльда Долинскде 1-чи номерли интернат-школда къууанчлы халда ачылгъанды.
«Молоды душой» деген араны регионда къуралыууна кеслери ыразылыкълары бла жамауат ишге тири къатышхан абадан адамланы къауумуну битеуроссей конкурсда хорлап, грант алгъанлары себеплик этгенди. Волонтёр араланы ассоциациясы бла «Память поколений» жандауурлукъ фонд къурагъан ол конкурс экинчи кере жетишимли ётгенин эмда анга къыралны 65 регионундан 201 заявка берилгенин да эсгертирге тийишлиди.
Араны къууанчлы ачылыууна КъМР-ни жарыкъландырыу, илму эм жаш тёлюню ишлери жаны бла министри Ауес Кумыков, КъМР-ни урунуу эм социал къоруулау министри Асанланы Алим, РФ-де Волонтёр араланы ассоциациясыны толтуруучу директору Резеда Валиуллина, Добровольчествогъа себеплик этиу жаны бла регион ресурс араны башчысы Светлана Самофалова, «Молоды душой» федерал программаны координатору Наталья Русакова, башха ведомстволаны бла организацияланы келечилери да къатышхандыла.
Анда сёлеше, Ауес Кумыков волонтёрланы даражалы конкурсда хорламлары эмда мекям къоллу болгъанлары бла алгъышлагъанды. «Сиз мындан ары да кёп жандауурлукъ жумушла тындырлыгъыгъызгъа ийнанама. Биз а сизге дайым да билеклик этгенлей турлугъубузгъа ышандырама»,-дегенди.
Асанланы Алим да энди, жыл санларына да къарамай, жамауатха жараргъа, огъурлу ишле этерге итиннгенлеге жыйылыр, оноулашыр жер къуралгъанына къууаннганын билдиргенди, саулукъ, узакъ ёмюр тежегенди.
Резеда Валиуллина быллай арала Россейни 28 регионунда ачылгъанларын, бизни республикадагъы 29-чу болгъанын билдиргенди. «Къабарты-Малкъарда «кюмюш» волонтёрланы кёп проектлери жашауда жетишимли бардырыладыла. Ала кюн сайын да социал проблемала бла байламлы жумушла тындырадыла, тюрлю-тюрлю акцияла ётдюредиле. «Молоды душой» деген араны хайырындан энтта да кёп сейир проектле толтуруллукъларына мен ишексизме»,-дегенди
Андан сора келген къонакъла, мекямны ичине кирип, анда волонтёрланы презентацияларына къарагъандыла. Наталья Русакова алагъа «Молоды душой» деген программаны, экспертле бла тюбешиулерини,мастер-классланы юсюнден да тынгылы хапар айтханды, уллу экранда суратланы да кёргюзтгенди.
