Ведомствола аралы комиссияны келечилери аманлыкъ этгенлерине ишеклилени эркинликлери къалай сакъланнганларын сюзгендиле. Аны къауумуна уа КъМР-ни Башчысында граждан обществону айнытыу эм адамны эркинликлери жаны бла комиссияны, Адамны эркинликлери жаны бла уполномоченныйни аппаратыны, КъМР-де Ич ишле министерствону эмда ведомствону Жамауат советини, прокуратураны, Жамауат-тинтиу комиссияны келечилери киргендиле.
Эки кюнню ичинде ала аманлыкъ этгенлерине ишекликде изоляторлада (ала уа республикада ючдюле) тутулгъанла, административ арест салыннганла (эки объект), ич ишле органланы районлада бёлюмлеринде энчи приёмникледе тургъанла бла тюбешгендиле.
Ачыкъланнганыча, ИВС-леде, приёмникледе да жууаплы къуллукъчула, фельдшерле инсанланы саулукъларын тинтедиле, камералада санитария болумгъа эсгертиуле этилмегендиле.
Тутулуп тургъанланы арасында тинтиуле да бардырылгъандыла. Алагъа 21 соруугъа жууапла берирге тюшгенди, ол санда аланы эркинликлери эм праволары къалай сакъланнганларыны юслеринден да. Соруугъа 36 инсан къатышханды, ала барысы да тарыгъыулары болмагъанларын, изоляторлада, спецприёмникледе алагъа тийишли халла къуралгъанларын айтхандыла.
Алай бла ведомствола аралы комиссия ИВС-леде, районлада приёмникледе аманлыкъ этгенлерине ишекликде тутулуп тургъанланы эркинликлери тийишлисича сакъланнганларын тохташдыргъанды.
Бизни корр.
