Къабарты-Малкъарны Башчысыны къуллугъун болжаллы халда толтургъан К.В. Коков «контроль сагъат» халда КъМР-ни Правительствосуну оноучулары бла социал бёлюмню вопрослары бла байламлы жыйылыу бардыргъанды. Кёп сабийли юйюрлени жашау журтларын игилендирирча болушлукъну, льготачыланы дарманла эм медицина керекле бла жалчытыуну юсюнден докладланы КъМР-ни урунуу эм социал къоруулау министри Асанланы А.О., КъМР-ни саулукъ сакълау министри М.Б. Хубиев окъугъандыла.
Бусагъатда, деп белгиленнгенди кенгешде, республиканы саулукъ сакълау министерствосу сахар диабетден ауругъанланы инсулин помпаларына бюгюнлюкге изленнген затларын тапдырылыуун жалчытханды. Республиканы багъыу махкемелерине аланы керекли ёлчеми тапдырылгъанды. Аны бла бирге бир къауум башха дарманланы алыу соруу тамамлауну излейди. КъМР-ни Правительствосуна бу жаны бла бардырылгъан ишни игилендирир ючюн къошакъ ырысхы бёлюнюрча онгланы излерге буюрулгъанды.
Белгиленнген бёлюмде салыннган борчланы болжалгъа салмагъанлай тындырылыуларына кёре боллукъду адамланы жашауларыны качествосу да, деп чертгенди регионну таматасы. Бу жумушлагъа къоранчланы ахча бла жалчытылыныуу, деп къошханды Коков, келлик кезиуге бюджетни къурагъанда энчи магъаналыланы санында болургъа тийиишлиди.
«Контроль сагъатны» чегинде республиканы школларыны жангы окъуу жылгъа хазырлыкъларыны, Къабарты-Малкъарда Бир къырал экзаменни бардырылыууну эсеплерини юсюнден КъМР-ни жарыкъландырыу, илму эм жаш тёлюню ишлери жаны бла министри А.М. Кумыков сёлешгенди. Экзаменле, деп белгилегенди ол, низам халда, техника жанындан чурумсуз ётгендиле. ЕГЭ-2019 берген окъуучуланы саны 4672 адам болгъанды. Экзаменлени бардырылыуларына Рособрнадзорну келечилери, 143 федерал эм 61 регионал къараучу контроль этгендиле. Ишлени тинтгенден сора баш магъананы тутхан дерследен порог балла алмай къалгъанланы саны республикада азайгъаны белгили болгъанды.