КъМР-де «Лидерство эм регионну айнытыу» деген билим бериу программаны биринчи бёлюмю ишлеп башлагъанды. Аны республиканы власть органларына кадр резервни хазырлауну чеклеринде РФ-ни Президентинде Россейни халкъ мюлкюню эм къырал къуллукъну академиясыны Къыралгъа башчылыкъ этиуню баш школу (ВШГУ РАНХиГУ) бардырады. Анга «Россей - онгланы къыралыды» автоном коммерцияла болмагъан организация эмда КъМР-ни Башчысыны Администрациясы да себеплик этедиле.
Окъутууну биринчи бёлюмю Нальчикде 4-7 июльда бардырылады. Анга «Жангы бийиклик» эмда «Россейни лидерлери» деген конкурслада хорлагъанла къатышадыла. Аны 4 июльда «Азимут» къонакъ юйде къууанчлы халда ачылыууна КъМР-ни Башчысыны къуллугъун болжаллы халда толтургъан Казбек Коков, РФ-ни Президентини Шимал-Кавказ федерал округда толу эркинликли келечисини орунбасары Сергей Стариков, КъМР-ни Башчысыны Администрациясыны таматасы Мухамед Кодзоков, Къонакъбайлыкъ индустрияны миллет союзуну башчысы, «МРИЯ» курортну директору Грант Бабасян къатышхандыла. Аны «Россей – онгланы къыралыды» организацияны келечиси Антон Сериков бардыргъанды.
Аны аллында уа Казбек Коков, журналистлени сорууларына жууапла бере, кадр конкурсла, быллай окъутуула республикагъа артыкъда магъаналы болгъанларын чертгенди. «Биз ёсюп келген тёлюге фахмуларын, билимлерин, чемерликлерин ачыкъларгъа, кеслерине жашауда тийишли жер табаргъа онгла къураргъа керекбиз. Бу семинар а анга себеплик этерикди. Окъууну тюрлю-тюрлю сфералада экспертле, МГИМО-ну, башха белгили вузланы профессорлары бардырлыкъдыла. Ала республиканы айнытыуну жолларын ачыкъларгъа болушурукъларына ышанама»,-дегенди ол.
Ызы бла окъутуугъа къатышханла бла тюбешиу башланнганды. Казбек Коков жаш адамланы алгъышлай, экспертлени билимлерине, сынауларына юйренирге чакъыргъанды. «Бюгюнлюкде къыралны, республиканы аллында уллу борчла салыннганларын барыбыз да билебиз. Бек алгъа къыралны башчысыны май указларында белгиленнген ёлчемлени тамамларгъа керекбиз. Аланы уа барыбыз да бирге къадалып ишлесек толтураллыкъбыз»,-дегенди ол.
Сергей Стариков а къыралда жаш адамлагъа башламчылыкъларын жашауда бардырыргъа онгла, амалла къуралгъанларын белгилегенди. Аладан бирлерин а «Россей – онгланы къыралыды» организацияны сайтында табаргъа боллукъду. Ол жаш адамланы уллу муратла салыргъа, жетишимли болургъа, айныргъа чакъыргъанды.
Грат Бабасян кеси да Къыралгъа башчылыкъ этиуню баш школун бошагъанды. Ол байламлыкъла къураргъа, магъаналы проектлени жашауда бардыргъанда бирге ишлерге кереклисини юсюнден айтханды.
«Лидерство эм регионну айнытыу» деген билим бериу программаны чеклеринде уа, Антон Сериков ангылатханыча, семинарла, мастер-классла бардырыладыла. Окъутууну кезиуюнде энчи эс Кавказны болумуна, аны субъектлерин айнытыуну онгларын ачыкълаугъа буруллукъду. «Сизни бла регионну тинтиу бла кюрешген алимле ишлерикдиле, ол санда МГИМО-ну, федерал вузланы профессорлары да. Ахырында уа къауумлагъа юлешинип, проектле жарашдырлыкъсыз эмда аланы къорууларгъа керексиз»,-дегенди ол.
Биринчи проектни уа жаш лидерле алайда окъуна тамамлагъандыла. Ала къауумлагъа юлешинип, республикада туризмни, гитче эм орталыкъ бизнесни, эл мюлкню, демографияны, экологияны айнытыуда чырмауланы ачыкълап, аланы кетериуге кёз къарамларын айтхандыла. Дагъыда жаш адамла республикадан нек кетгенлерини, ала туугъан журтларында къалырча къаллай онгла берилирге кереклисини юслеринден оюмларын да белгили этгендиле.
Программаны экинчи бёлюмю уа РАНХиГУ вузда бардырыллыкъды. Окъуучула бла алимле бирге федерал министерстволаны бла ведомстволаны башчылары, белгили бизнесменле ишлерикдиле.