Социалист Лэжьыгъэм и ЛIыхъужь, РСФСР-м и Къэрал саугъэтым и лауреат, Къэбэрдей-Балъкъэрым и цIыхубэ усакIуэ КIыщо­къуэ Алим къызэралъхурэ илъэси 104-рэ щрикъум ирихьэлIэу, гъэ къэси хуэдэу, пэкIу щекIуэкIащ абы и фэеплъым деж. КIыщокъуэ Алим и цIэр зезыхьэ уэрамым тет Налшык къалэ администрацэм и гупэм къит фэеплъым деж щызэхуэсахэм яхэтт тхакIуэр фIыуэ зыцIыхуу щытахэр, жылагъуэ, политикэ Iуэху зезыхьэхэр, гъуазджэмрэ щэнхабзэмрэ я лэжьакIуэхэр, лъэпкъ интеллигенцэр, усакIуэм и благъэхэр, Iыхьлыхэр, ныбжьэгъухэр, и усэхэр фIыуэ зылъагъухэр.

- Къэбэрдей-Балъкъэрымрэ адыгэ лъэп­къымрэ тхакIуэ щэджащэм дуней псом къаригъэцIыхуащ. ЩIыналъэм исхэр дызэрыгушхуэ тхакIуэм и цIэр щIэблэм щыдмыгъэгъупщэну нэхъыжьхэм ди къалэнщ. ТхакIуэшхуэр къы­щалъхуа махуэмкIэ зэхыхьэм кърихьэлIахэм сыны­вохъуэхъу икIи фIыщIэ фхузощI, усакIуэ­шхуэр фи гум зэрилъым папщIэ. Лъэпкъ литературэм и тхакIуэ нэхъыжьхэми абыхэм къащIэ­хъуэхэми КIыщокъуэ Алим сыт щыгъуи я гъуэгугъэлъагъуэу, щапхъэу, гъащIэ гъуазэу къонэж, - жиIащ КъБР-м щэнхабзэмкIэ и министр Къу­махуэ Мухьэдин КIыщокъуэ Алим и фэеплъ пэкIур къыщызэIуихым.

- УсакIуэшхуэм и тхылъ купщIафIэхэр зэIэпытхыу зэрыщытам срогушхуэ. КIыщокъуэр си цIы­хугъэу, куэдкIэ къыздэIэпыкъуу зэрыщытар сигу къи­нэжащ. Абы и псалъэм ­пщIэ­шхуэ иIэт. «Социалист Лэ­­жьыгъэм и ЛIыхъужь» щIыхьыцIэр абы къыщы­хуагъэфэщам, республикэм ис лъэпкъ псоми я махуэшхуэт, - жиIащ КъБР-м цIыхум и хуитыныгъэхэр ­хъумэнымкIэ и уполномоченнэ Зумакулов Борис.

Филологие щIэныгъэхэм я доктор Гъут Iэдэм жиIащ усакIуэшхуэр цIыхубэм зэ­пы­мыууэ зэращIыгъур, тхакIуэм и IэдакъэщIэкIхэм гупсысэ куу зэращIэлъыр, ахэр зэрыкупщIэбэр, абы и зэфIэкIым кIуэ пэтми нэхъри зэрыригушхуэр, усакIуэр щIэх-щIэ­хыурэ ягу къызэрагъэ­кIыжыр, псалъэ гуапэхэр зэрыхужаIэр зэрыуасэншэр.

Лъахэхутэ, тхылъ тедзапIэм и унафэщI Котляров Виктор къыхигъэщащ нэ­гъуэщI щIыпIэхэм къикIыу ди щIыналъэм зыгъэпсэ­хуакIуэ къакIуэхэр КIыщокъуэ Алим, ­Кулиев ­Къайсын сымэ я тхылъхэм зэрыщIэуп­щIэр гуапэ зэрыщыхъур.

КIыщокъуэ Алим и цIэр зезыхьэ Щхьэлыкъуэ къуажэм и курыт еджапIэ №2-м щыщ ныбжьыщIэ цIыкIухэр къеджащ я хэкуэгъу цIэрыIуэм и усэ нэхъыфIу ялъагъухэм.

ЗэIущIэм хэтахэм усакIуэшхуэм и фэеплъым удз гъэгъахэр тралъхьащ. ПэкIум кърихьэлIахэр кIуащ КIыщокъуэ Алим къыщалъхуа икIи щы­щIалъхьэжа Щхьэлыкъуэ къуажэм, абы дэт и ­фэеплъ музейм. КърихьэлIахэр усакIуэм и гъащIэмрэ и гуащIэмрэ тепсэлъыхьащ, и усэхэм ­къеджащ.