РФ-ни жарыкъландырыу министри Ольга Васильева, Къырал Думада «Россей Федерацияда билим бериуню качествосун ёсдюрюуню юсюнден» уллу парламент тынгылаулада сёлеше, школчуланы исси аш-азыкъ бла жалчытыу къалай къуралгъаныны юсюнден да айтханды.
- Мартда биз школда исси аш-азыкъ бла жалчытыуну къурау не халда болгъанын тинтип кёргенбиз. Бизни окъуучуларыбызгъа къайгъыргъан, аланы къалай ашатханларына кёз-къулакъ болгъан депутатлагъа мен бек ыразыма. Энди бизге битеу жыйышдырылгъан шартланы сюзерге тюшерикди, алай а кёп затны тюзетирге керек болгъаны шёндюден окъуна баямды,- дегенди министр.
Аллай тинтиуле исси аш-азыкъ бла къаллай бир сабий жалчытылыннганын, аны багъасын, бу иш къайсы регионда къалай къуралгъанын билирге онг бередиле. «Бюгюнлюкде сабийлени жюз процентин эрттенликде ауузландырыу бла жаланда Къабарты-Малкъар ёхтемленирге боллукъду»,- деп белгилегенди Васильева.