Тюнене Нальчикде Къабарты-Малкъар бла РАН-ны Федерал илму-излем социология арасы байламлыкъда ишлеу келишимге къол салгъандыла. Эки жанлы байламлыкъланы баш ызларын тюбешиуню чеклеринде КъМР-ни Правительствосуну Председатели Мусукланы А.Т. бла ФНИСЦ РАН-ны директору, Социологланы россей биригиуюню биринчи вице-президенти М.К Горшков сюзгендиле.
Сёз жамауат оюмну илму жаны бла биригип тинтиу ишни къурауну эмда бардырыуну, республикада жашагъанланы жарсытхан социал сорууланы, болгъан социология къолайлыкъны хайырланып регионну мындан ары айнытыуну, законла чыгъарыучу башламчылыкъланы магъаналылыкъларыны эксперт тинтиулерини, социология специалистлени тюрлениулеге кёре жангыдан юйретиуню юсюнден баргъанды.
Къабарты-Малкъар, деп чертгенди Михаил Горшков, власть органла бла, эм алгъа жамауатны сейирлерин эсге алып, байламлыкъла къурауну ышангылы илму таянчагъы болгъан регионладан бириди. «Ол а оноу этиу сынамгъа профессионал социология илму билим тири къошулууда социал кенгликни ёсюуюне да магъаналыды. Къол салыннган келишимни жашаугъа кийириу регионну ахшы политикасыны андан ары бардырылыууду».
Ахырында академик Горшков Элбрус тийрелеринде бу кюнледе бардырыла тургъан Жаш социологну онекинчи Битеуроссей школасыны къуралыууну бийик даражасын белгилегенди.
Тюбешиуге Юг федерал университетни Социология эм регионоведение институтуну илму башчысы Юрий Волков, КъМР-ни жарыкъландырыу, илму эм жаш тёлюню ишлери жаны бла министри Ауес Кумыков да къатышхандыла.