Аушигерде гидроэлектростанцияда бу кюнледе от ёчюлтюу жаны бла юйрениуле бардырылгъандыла. «РусГидро» компанияны Къабарты-Малкъарда бёлюмюнден билдиргенлерине кёре, анда ГЭС-ни администрациясы, республиканы от ёчюлтюучю-къутхарыучу службасы эмда МЧС-ни КъМР-де баш Управлениясы быллай къыйын болумлада бирге къалай ишлерге кереклисин белгилегендиле. Юйретиуге битеу да 60 адам къатышханды эмда онбир энчи машина хайырланылгъанды.

Иш башланырны аллында, ведомстволаны эмда станцияны къауумларына ГЭС-ни машинала тургъан залында трансформаторладан бирине от тюшгенди деп билдириу этилгенди. Ызы бла андан жау тёгюлюп, отоуну ичин тютюн басханды. Ол айтылгъаны бла сменны башчысы токну ёчюлтгенди эмда анда болгъан битеу оборудованияны ишин тохтатханды. От ёчюлтюучюле жетгинчи ол тийреде болгъан адамланы терк окъуна тышына чыгъаргъандыла. Ала келген сагъатха уа от 250 квадрат метрге жайылгъан эди. Специалистле отоуланы барын да тинтип, анда чыгъалмай къалгъан биреуленни къутхаргъандыла. Ызы бла отну ёчюлтюрге да амал табылгъанды.

МЧС-ни от ёчюлтюу эмда къутхарыу ишле бардырыу бёлюмюню башчысы Анзор Кагазежев юйретиуле специалистлени усталыгъын кётюрюрге онг бередиле, аны хайыры бла, кёп службаланы бла ведомстволаны келечилери быллай къыйын кезиуледе бирлешип мадар этерге юйренедиле, дегенди.