Жай жылыу келгени бла жолчула да тири къармашып башлагъандыла. Алай бла «Къоркъуусуз эмда качестволу жолла» деген миллет проектни чеклеринде Терк районда Дейское – Тёбен Курп жолну жангыртыу барады. Ремонт ишле аны эки кесегинде (онеки километр чакълы) бардырыллыкъдыла, кеси да Шимал Осетияны чегине дери.
Реконструкцияны чеклеринде «Дизайн-К» подряд организацияны специалистлери жолну мурдорун тынгылы жарашдырып, жангы асфальт саллыкъдыла, жаны бла суу быргъыла орнатырыкъдыла, тёгерек-башын тапландырлыкъдыла, автобусла тохтарча жерле къурарыкъдыла. Ол жумушланы барын да быйылны ахырына дери тамамларгъа белгиленеди.
Прохладныйде уа талай орамгъа тынгылы ремонт этиле турады. Жолчула ишни башлагъынчы, «Водоканалны» бла «Теплоэнергону» специалистлери суу эмда жылыу баргъан (тозурагъан) быргъыланы алышындыргъандыла. Ызы бла 76 бордюр орнатылгъанды.
Бу кюнледе къурулушчула асфальт салыу бла къыстау кюреше турадыла. Ишлени барына да республиканы бюджетинден 50 миллион сом берилгенди. Жер-жерли бюджет да аны юсюне бир миллион сом къошханды.