22 июньда - Эсге тюшюрюуню эмда бушууну кюнюнде - эрттенликде 4 сагъатда Нальчикде солуу паркда «Ёмюрлюк от» мемориалны тийресине жамауат аслам жыйылгъан эди. Аланы арасында законла чыгъарыучу эм толтуруучу власть органланы, жамауат эм дин организацияланы келечилери, право низамны сакълаучула, Юнармияны жаш аскерчилери да.
Акциягъа къатышханланы алларында Урушну, урунууну, Сауутланнган кючлени ветеранларыны Нальчик шахарда советини башчысы Абдуллаланы Мустафа сёлешгенди. Ол танг ата башлагъан кезиуде ол къанлы къазауатда жоюлгъан жигитлерибизге хурмет этерге келгенлеге ыразылыгъын айтханды. Жаш тёлюге айланып, тарыхны билирге, Уллу Хорламны даражасын учуз этерге кюрешгенлеге къажау турургъа, тарыхны кеслерине таплыкъгъа тюрлендирирге излегенлеге аллай онг бермезге чакъыргъанды.
Ызы бла алайда муслийман эм христиан дин тёреле бардырылгъандыла. Ол къазауатда жанларын бергенлени бир минут шумсуз туруп эсгергенден сора мемориалны тийресинде жау чыракъла жандырылгъандыла. Акциягъа къатышханла эсгертмеге гюлле да салгъандыла.