Москвада Ислам жаны бла бирге ишлеуню организациясына кирген тыш къыралланы Энчи эмда Толу эркинликли посолларын «Россей – Ислам дуния» деген стратегиялы кёз къарамны къаууму бла шагъырей этгендиле. Анга аталгъан жыйылыугъа Къабарты-Малкъарны Башчысыны къуллугъун болжаллы халда толтургъан Казбек Коков да россейли келечилени санында къатышханды.
Анда алгъыш сёз бла Россейни тыш къыралла бла ишлерини министри Сергей Лавров сёлешгенди. «Бизни,-дегенди ол,- ислам дунияны къыраллары бла байламлыгъыбыз ёмюрлени теренинден келеди. Бюгюнлюкде да хар жаны бла да айный барады. Бизни халкъла аралы правогъа, тенгликни бла тюзлюкню ниетлерине табыннганыбыз, бир бири сейирлерибизни эсге алгъаныбыз, халкъланы маданият энчиликлерине, адет-тёрелерине, аланы политика, социал эмда экономика айныуну жолун кеслери алларына сайларгъа итиниулерине хурмет этгенибиз бирикдиреди.
Россейли башчыланы Ислам жаны бла бирге ишлеуню организациясына кирген къыралла бла тёрели шуёх байламлыкъланы кючлендириу жаны бла атламларына жамауатны иги кесеги ыразыды, регионларыбыз, артыкъда халкъларыны асламысы, ислам динни тутханлары, анга тутхучлулукъ этедиле. Муслийман къыраллада партнёрларыбызны да аллай ниетлери болгъанларын уллу ыразылыкъ бла белгилейбиз».
Министр шёндюгю болумда «Россей – Ислам дуния» деген стратегиялы кёз къарамны къаууму энчи магъана тутханын да белгилегенди. Анга Россейни бла Ислам дунияны араларында байламлыкъланы кючлендириуге къошумчулукъ этерге итиннгенлени мадарларын бирге тийишдириу жаны бла жууаплы борчла тамамларгъа тюшеригин чертгенди.
Жыйылыугъа дагъыда РФ-ни Федерал Жыйылыууну Къырал Думасыны депутатлары, Россейни Президентини Администрациясыны келечилери, алимле, экспертле, жамауат эмда дин биригиулени келечилери къатышхандыла.
«Россей – Ислам дуния» деген стратегиялы кёз къарамны къаууму 2006 жылда РФ-ни Президенти Владимир Путинни буйругъу бла Россейни ислам дунияны къыраллары бла байламлыкъларына хар жаны бла да себеплик этер муратда къуралгъанды. Жангы организациягъа дипломат Евгений Примаков бла Татарстанны биринчи президенти Минтимер Шаймиев башчылыкъ этгендиле. 2014 жылда Владимир Путин ол Къауумну башчысына Татарстанны таматасы Рустам Миннихановну салгъанды.
Хауа хазырлагъанды.