К.В. Коков КъМР-ни Правительствосуну башчылары, министерстволаны бла ведомстволаны таматалары бла кенгертилген кенгеш бардыргъанды. Жыйылыу РФ-ни Президенти Владимир Путинни «Бийик къуллукълада ишлегенлени бла Россей Федерацияны субъектлерини толтуруучу власть органларыны ишлерине багъа бичиуню юсюнден» Указыны республиканы тийресинде бардырылыу соруула бла байламлы болгъанды.
Стратегиялы докуменде белгиленнген борчлагъа кёре бусагъатда регионлагъа тийишли кёрюмдюлени, 2024 жылгъа дери аланы тергеу амалланы, РФ-ни Правительствосу къабыл кёрген ишлерини магъаналылыкъларына багъа бичиу жаны бла тизмеге федерал грантланы бла бюджетле аралы трансфертлени юлешиуню жорукълары жарашдырыладыла. Аланы санында экономиканы бюджетден тышында бёлюмюнде бийик чыгъарыучу кючлери болгъан жангы ишчи жерлени къуралыулары, гитче эм орта бизнес бла кюрешгенлени кёбейтиу, билим бериуню даражасын ёсдюрюу, адамлагъа жашау журтланы алыргъа женгиллендириу, урунууну кючлеу, айлыкъны ёсдюрюу, жашауну узунлугъун кёбейтиу, баш капиталгъа инвестицияланы ёлчемлерин аслам этиу, къолайсызлыкъны азайтыу, жамауатны адам санын кёбейтиу, инсанланы жашау журт болумларын игилендириу, шахарда тап болумланы жалчытыу, шёндюгю транспорт айыргъан жолланы эмда регион магъаналы автомобиль жолланы къурулушлары дегенчала бардыла.
КъМР-ни премьер-министри Мусукланы А.Т. КъМР-ни экономиканы айнытыу министри Рахайланы Б.М., КъМР-ни къурулуш эм жол мюлк министри В.Х. Кунижев, КъМР-ни саулукъ сакълау министри М.Б. Хубиев, КъМР-ни урунуу эм социал къоруулау министри Асанланы А.О. билдирген информациягъа тынгылап, республиканы таматасы былай чертгенди: «Была къыралны социал-экономика жаны бла жыллагъа алгъа айныу магъаналы ызладыла, аланы толтурулгъанларыны эсеплерине кёре властьны ишини жер-жерледе магъаналылыгъы белгиленирикди.
Аны бла бирге алгъадан окъуна эсигизни бурургъа излейме, багъа бичиуню кёрюмдюлери, санауланы методикалары, отчётла да, сёзсюз, эм магъаналыдыла. Алай алагъа жаланда къургъакъ тарихлегеча угъай, магъаналылыкъларына кёре жетишимле болдуруугъа артыкъ эс бурургъа тийишлиди. Хар бирибизден да бу ишге сууукъ кёзден къарау, тергеп туруу угъай, эм биринчиден кёрюмдюле белгилеген борчлагъа жетиу изленеди».
КъМР-ни Башчысыны къуллугъун болжаллы халда толтургъан К.В. Коков Министрлени кабинети бла жер-жерледе санитар болумла, республиканы районларын тохтаусуз суу бла жалчытыу, эл мюлк жерлени буз уруудан къоруулау мадарла бла байламлы сорууланы энчи сюзгенди. КъМР-ни Правительствосуна муниципал къуралыуланы таматалары бла бирге белгиленнген борчланы тамамларча болжалгъа салмай къошакъ ырысхы мажарыргъа буйрукъла берилгендиле.
