Сочэ къалэм дэт «Фыщт» стадионым щызэхэтащ Инарыкъуей щыщ футбол командэмрэ хэгъэрейхэмрэ я зэныбжьэгъугъэ зэIущIэ. Къэбэрдей-Балъкъэрым и «Уличный красава-2018» гупыр 1:3-уэ къыхигъэщIащ Урысей Федерацэм и япэ дивизионым мы гъэм щытекIуэу къэралым и гуп нэхъыщхьэм хыхьа «Сочи» командэм.
Ди щIалэхэм ящыщу топ закъуэр дигъэкIащ Тумэ Азэмэт. «Уличный красава-2018» акцэм ипкъ иткIэ, уэрам командэхэм щыджэгу щIалэ цIыкIухэм къыхахыу зэхагъэува гупыр дэджэгуащ Урысейм и премьер-лигэм щыджэгуну иджыблагъэ Iэмал зэзыгъэгъуэта балигъ командэм.
Ди щIалэхэм дэIэпыкъуныгъэ яритащ Урысейм и чемпионатхэм медалрэ кубокыу нэхъыбэ дыдэ къыщызыхьа тренер цIэрыIуэ Газзаев Валерий.
«Мы щIалэхэм зы махуи сабий спорт школхэм зыщагъэсакъым. Командэм хэтар уэрам футбол джэгухэрщ, ахэр зэман кIыхькIи, губгъуэшхуэми щыджэгуакъым. Дауи, техникэ, тактикэ а лъэныкъуэкIэ щыщIэныгъэ зэраIэр наIуэт. Ауэ гукъыдэжрэ, жыджэрагъыу яхэлъым гу лъумытэнкIэ Iэмал иIэтэкъым. Абыхэм я дежкIи сэпэбышхуэ зыпылъ Iуэхугъуэу къызолъытэ мы зэIущIэр. ЩIалэ цIыкIухэм къащIащ профессионал футболымрэ уэрам футболымрэ я зэщхьэщыкIыныгъэр», - жиIащ зэIущIэ нэужьым Газзаевым. Тренер цIэрыIуэм къыхигъэщащ «Урысейсо цIыхубэ фронтым» и щIалэгъуалэ къудамэм къыхилъхьа «Уличный красава» къэралпсо акцэр футболым зегъэужьыным, ныбжьыщIэр гъащIэ узыншэм къыхуеджэнымкIэ сэбэпышхуэ зэрыхъур.
«Акцэм и къалэн нэхъыщхьэр топ дэгъэкIыныра-къым, атIэ топджэгум гукъыдэж хуаIэнырщ. Дэ ди нэгу щIэкIащ, топ дагъэ кIахэм яужькIэ абыхэм я нэгум зэрызихъуэжыр, Сочэ щыпсэухэр щIалэ цIыкIухэм къазэрыдэщIыр», - жиIащ «Урысейпсо цIыхубэ фронтым» и щIалэгъуалэ къудамэм и унафэщI Кастючкевич Игорь. - «Уличныйкра-сава.рф» сайтымкIэ щIалэ цIыкIухэр зэхуэтшэсын щыщIэддзам щыгъуэ «Уличный красава»-м хэтынур сабий миным нэблэгъэн ди гугъащ, арщхьэкIэ командэ 3420-рэ акцэм къыхэтшащ. Мы гъэм Урысейм СпортымкIэ и министерствэм и календарь планым дыхагъэхьащ. НыбжьыщIэ мин 35-м щIигъу хэтыну дыпоплъэ, ауэ куэдкIэ нэхъыбэ зэрыхъунум шэч къытесхьэркъым».
«Уличный красава-2019»-м хэтынухэм я тхылъхэр Iа хынущ мы гъэм и шы- щхьэуIум и 1 пщIондэ. Финалыр жэпуэгъуэм зэхэтынущ.
Фигу къэдгъэкIыжынщи, нэгъабэ щыIа зэхьэзэхуэ-хэм чемпион щыхъуащ Къэбэрдей-Балъкъэрым щыщ «Инарыкъуейр».
