Къэбэрдей Адыгэ Хасэм и къудамэ Шууей Хасэм щыщ гупышхуэ ­мэкъуауэгъуэм и 16-м Ингуш Республикэм хыхьэ Сунжэ къалэм щыIащ.
Адыгэ фащэ екIухэмкIэ зэщы­хуэ­пыкIа, зи бжыгъэр 50-м нэблагъэ ­щIалэхэмрэ абыхэм ящIыгъуа пщащэхэмрэ ирагъэблэгъащ УФ-м и МВД-м ­Назрань къалэм щиIэ и уп­равленэм и унафэщIым и къалэнхэр пIалъэкIэ зыгъэзащIэ, полковник ­Цечоев Нухь и унагъуэм щыщхэм, и гъунэ­гъухэм, и Iыхьлыхэм.
ЗекIуэ зэдежьахэм гуапэу къащыпежьащ Назрань, Сунжэ къалэхэм я гъунапкъэм и деж. Адыгэ ныпымрэ Ингушым я бэракъымрэ яIыгъыу, ­къафэрэ джэгуу къаIущIащ бысым-хэр. Къэбэрдей-Балъкъэрым и къа­лащхьэм, и къуажэ зыбжанэм икIыу а республикэм къыщыхута ди щIалэхэмрэ пщащэхэмрэ къызэранэкIа гъуэгум гугъу зэрыщехьа тIэкIур зэ­ращигъэгъупщэжам шэч къытеп­хьэ­жынутэкъым, зэIущIахэр ап­хуэ­дизу зэрызэщыгуфIыкIар, зэрызэ­хуэ­гуш­хуэр плъэгъуа иужькIэ.
Сунжэ къалэм и уэрамхэм ящыщ зым тет уней лъапсэм цIыхуи 100-м щIигъу я хьэщIэхэмрэ я Iыхьлыхэм-    рэ дызэрыщрагъэблэгъэфар гъэ­щIэ­гъуэнт, ауэ, итIани, тхужыIэнущ дэ тщыщу зыри гулъытэншэу къы­зэрамыгъэнар. Бысым нэхъыжьхэм Къэ­бэрдейм, зэрыщыту къатщтэмэ, адыгэхэм псалъэ гуапэ куэд къыт­хужаIащ, ди адэжьхэм я зэхуаку дэлъа зэныбжьэгъугъэм дяпэкIи пы­щэн зэры­хуейр лъэныкъуитIми къыхагъэщащ.
Къэбэрдей Шууей Хасэм и тхьэмадэ Къудей Аслъэн унагъуэр зей ­Цечоев Нухь ди гупым къыбгъэдэ-кIыу тыгъэ хуищIащ - зи сампIалъэр дыжьын тхыпхъэщIыпхъэхэмкIэ гъэ­щIэрэщIа къамэ телъыджэ, щIакIуэрэ абы дэхъун щхьэрхъуэнрэ. Къыхэгъэщыпхъэщ, бысымхэри къызэримыкIуэтар, уеб­лэмэ, къытхуемыбжэкIми, кIуахэм ­нэхъыбэжкIэ къа­зэрыхуэупсар.
Мыри къыжыIэпхъэщ. Иджырей зекIуэм ипэкIи Шууей Хасэм хэтхэр 2018 гъэм и фокIадэ мазэм а республикэм ирагъэблэгъат. Абы щыгъуэ шууейхэм хьэщIагъэ къезыхар Троицкэ къуажэм дэс нэхъыжьыфI Нальгиев Хъусенрэ абы и Iыхь­лы­хэмрэт.
Тхыгъэри сурэтри