«Кавказ Ищхъэрэм и курортхэр» АО-м и пресс-IуэхущIапIэм хъыбар къызэрыдигъэщIамкIэ, Австрием и Тироль щIыналъэм и Инсбрук зыгъэпсэхупIэм мэкъуауэгъуэм и 12 - 14-хэм щекIуэкIащ «Урысей-Тироль саммит» зыфIаща япэ зэIущIэ. Властым щыщхэр, бгы-лыжэ зыгъэпсэхупIэхэм я тхьэмадэхэр, тур­операторхэр, масс-медиа унэтIыныгъэм и лIыкIуэхэр зыхэта зэхуэсыр къызэзыгъэпэщар Тироль щIыналъэм ТуризмэмкIэ и советырщ. Абдежым къыщызэхуэсахэм «Кав­каз Ищхъэрэм и курортхэр» ­АО-м и унафэщI ТIымыжь Хьэсэн яригъэлъэгъуащ езыр зи тхьэмадэ IуэхущIапIэм щызэхагъэува, Кавказ Ищхъэрэм турист кърагъэблэгъэфын и лъэныкъуэкIэ я зэфIэкIыр зыхуэдэр зыгъэнаIуэ проектыр.
Саммитым щызэрихьэлIахэм я гугъу ящIащ зыщыщ турист щIыналъэхэр зэпыщIэнымкIэ, зэдэлэжьэ­нымкIэ щыIэ Iэмалхэмрэ хэкIыпIэ­хэмрэ, я зыужьыныгъэм зэщхьу халъа­гъуэхэм, нэгъуэщIхэми.
ТIымыжь Хьэсэн жиIам тепщIыхь­мэ, нэгъуэщI къэралхэм «бгы-лыжэ» унэтIыныгъэм пыщIауэ щыIэ IуэхущIа­пIэхэм запыщIэным, ядэлэжьэным «Кавказ Ищхъэрэм и курортхэр» ­АО-м и унафэщIхэм гулъытэ хэха хуащI.
«Дызэрыт лъэхъэнэм бгы-лыжэ зыгъэпсэхупIэхэр, псом хуэмыдэжу Урысей Федерацэм итхэр, зыр адрейм и ныкъуэкъуэгъуу къэтлъытэнкIэ Iэмал зимыIэщ. Сыту жыпIэмэ, дэ псори дыхуэныкъуэщ, цIыху нэхъыбэ къурш­хэм дедгъэхьэхын, къитшэн папщIэ, къэдгъэлъагъуэ зыгъэпсэхукIэм пы­щIа щэнхабзэм, Iуэху бгъэдыхьэ­кIэхэм нэхъри зэрызедгъэубгъун, зэ­ры­зедгъэужьын Iэмалхэр къэгъуэ­тыным. Ауэ щыхъукIи, а зи гугъу ­сщIахэр къыдэхъулIэмэ, дэтхэнэми ди­Iэ­нущ дызыпэплъэ, дызыщыгугъ щIэупщIи ехъулIэныгъи», - къыхи­гъэбелджылыкIащ ТIымыжь Хьэсэн.
«Зым адрейм зэрызыщIигъэ­къуэ­фын унэтIыныгъэхэм ящыщу схужы­Iэнущ спорт зэхьэзэхуэхэр къуршхэм зэгъусэу къыщызэгъэпэщыныр, псоми ди зыужьыныгъэм ехьэлIа про­граммэхэр зэхэгъэувэныр, ски-пас­схэр зэщхьу гъэхьэзырыныр, цIыху­хэм дазэрыдэлажьэ, щэнхабзэм и ­Iэмал нэхъ дахэхэмкIэ, удэзыхьэххэмкIэ зэхъуэжэныр, зыгъэпсэхуакIуэхэр зыхуэныкъуэр щIыпIэдэлъху лъэпкъхэм ижькIэрэ къыддекIуэкI хьэщIагъэм епхыныр, нэгъуэщIхэри», - ды­щIи­гъужащ «Кавказ Ищхъэрэм и ­курортхэр» АО-м и тхьэмадэм.