«Iуащхьэмахуэ» курортым и лэжьэкIэр егъэфIэкIуэным топсэлъыхьУрысей Федерацэм Кавказ Ищхъэрэм и IуэхухэмкIэ и министрым и япэ къуэдзэ Байсултанов Одес бадзэуэгъуэм и 19-м Москва щригъэкIуэкIащ илъэс псом лажьэу Къэбэрдей-Балъкъэр Республикэм щыIэ «Iуащхьэмахуэ» курортым и инфраструктурэр къызэрагъэсэбэпым, илъэс гъунэгъухэм абы зегъэужьынымкIэ щыIэ хэкIыпIэхэм ятеухуа зэIущIэ. Абы ирихьэлIащ Къэбэрдей-Балъ- къэр Республикэм и Правительствэм и УнафэщIым и япэ къуэдзэ КIэрэф Мурат, «Кавказ Ищхъэрэм и курортхэр» акционер зэгухьэныгъэм и генеральнэ директор ТIымыжь Хьэсэн, «Кавказ Ищхъэрэм и курортхэр» акционер зэгухьэныгъэм и IэнатIэхэм я унафэщIхэр, Урысейм Кавказ Ищхъэрэм и IуэхухэмкIэ и министерствэм и IэщIагъэлI щхьэхуэхэр. Байсултанов Одес къыхигъэщхьэхукIащ туристхэм шынагъуэншагъэ къахузэгъэпэщыным хуэгъэзауэ IэнатIэ псоми ирагъэкIуэкI лэжьыгъэхэр зэгъэуIун зэрыхуейр. «Iуащхьэмахуэ лъапэ бгы-лыжэ туризмэм зыщегъэужьыныр Кавказ Ищхъэрэм и курорт IэнатIэм и унэтIыныгъэ хэхахэм ящыщщ. Дэ псоми ди къалэнщ «Iуащхьэмахуэ» урысейпсо курорт-рекреацэ комплексым и щытыкIэр дунейпсо мардэхэм едгъэзэгъыну, абы шынагъуэншагъэ къыщызэдгъэпэщыну», - жиIащ Байсултанов Одес. Иджыпсту курортым лыжэкIэ къыщажыхь и гъуэгухэр километр 15,4-рэ мэхъу. Бгым зэрыдэкI кIапсэ гъуэгу зэмылIэужьыгъуэу 7 мэлажьэ. Абыхэм ящыщщ «Мир» станцым щегъэжьауэ метр 3847-рэ зи лъагагъ щIыпIэм щыIэ, Европэ псом щынэхъ лъагэ дыдэ «Гара-Баши» станцым нэс кIуэуэ «Кавказ Ищхъэрэм и курортхэр» акционер зэгухьэныгъэм 2015 гъэм иригъэщIа кIапсэ гъуэгур. 2017 гъэм курортым щыIащ турист мин 334-рэ.
Поделиться: ЧИТАТЬ ТАКЖЕ:
|