Россейни Кюнюнде къыралны жаш инсанларына баш документлерин – паспортну – къууанчлы халда бериу ариу тёреге айланнганды. Бу жол а республиканы шахарларындан бла районларындан окъууда, жамауат жашауда айырмалы, тюрлю-тюрлю олимпиадалада, конкурслада, спорт эришиуледе алчы жерлени алгъан 21 жашны бла къызны Правительствону юйюне чакъыргъандыла. Мында алагъа паспортларын КъМР-ни Башчысыны къуллугъун болжаллы халда толтургъан Казбек Коков бергенди.
Тюбешиуге КъМР-де баш федерал инспектор Евгений Ткачёв, Къырал Думаны депутаты Геккиланы Заур, премьер-министр Мусукланы Алий, министрле да къатышхандыла.
Окъуучуланы бу магъаналы иш бла алгъышлай, Казбек Валерьевич Россейни инсаны, деменгили къыралны бир кесеги болуу уллу къууанч эм жууаплылыкъ салгъанын чертгенди. «Сиз Ата журтубузну тарыхы бла ёхтемленирге, аны айныууна кесигизни юлюшюгюзню къошаргъа керексиз. Паспорт а сизге турмушну кенг жоллары ачылгъаныны белгисиди.
Жыл саныгъызгъа да къарамай, жашауугъузда биринчи жетишимле болдургъансыз. Россейни, республиканы да келир кюню сизни къолугъузда болгъанын унутмагъыз»,-дегенди ол.
Сёзсюз, Россейни инсаны болгъанына шагъатлыкъ этген документни быллай байрам халда алгъанлары Анахаланы Исмайылны, Атмырзаланы Алиманы, Беканланы Азаматны, Жаппуланы Жамалны, Курданланы Жамиляны, Темукаланы Маринаны, Тотрукъланы Мариямны эм башхаланы эслеринде къаллыкъды
Жаш адамланы атындан а бу тюбешиуню къурагъанлагъа ыразылыгъын айтып Никита Кувичко сёлешгенди. Ол паспортну Россейни Кюнюнде - къыралыбызны уллу байрамында - алгъаны анга артыкъда магъаналы болгъанын чертгенди. «Мен жууукъларыма, республикагъа къолумдан келгенича болушургъа, туугъан журтуму айныууна юлюшюмю къошаргъа хазырма», - дегенди ол.
Ахырында Казбек Коков, жашланы бла къызланы энтта бир кере алгъышлап, алагъа окъууда, билим алыуда жетишимле тежегенди.
Алай къууанч аны бла бошалмагъанды. Казбек Валерьевич жаш адамланы Правительствону юйюн кёргюзтгенди, ызы бла уа татлы ашарыкъла эм чай бла да сыйлагъанды. Ушакъны кезиуюнде уа жашла бла къызла жашауларын къаллай усталыкъ бла байламлы этерге сюйгенлерин айтхандыла, республиканы оноучусуна соруула да бергендиле.
Бу хычыуун кюн аланы эслеринде кёпге къалыр ючюн алагъа «100 чудес Кабардино-Балкарии» деген сейир китапла саугъаланнгандыла.
