Дыгъуасэ КъБР-м и Правительствэм и Унэм КIуэкIуэ Казбек щыхуэзащ урысейпсо цIыхубэ фронтым и штаб нэхъыщхьэм хэт, «Вера» псапащIэ фондым и къызэгъэпэщакIуэ Федермессер Аннэ.

ЗэIущIэм щытепсэлъыхьащ паллиативнэ дэIэпыкъуныгъэр тэмэму къызэгъэпэщыным, сымаджэ нэхъ хьэлъэ дыдэхэм ядэлэжьэфын IэщIагъэлIхэр гъэхьэзырыным, программэ зэмы­лIэу­жьыгъуэхэр зэщIыгъуу гъэзэщIэным.
Урысейм и Президент Путин Владимир Федеральнэ Зэхуэсым Зэры­зы­хуигъэзам къыщыгъэлъэгъуа къалэн-хэр гъэзэ­щIэным хиубыдэу урысейпсо цIыхубэ фронтым зэхилъхьащ пал­лиативнэ дэIэ­пыкъуныгъэм зегъэу­жьыным тещIыхьа «Гулъытэ здэщыIэ щIыналъэ» проектыр икIи ар щагъэунэхуну субъектхэм ящыщ зыщ Къэбэрдей-Балъкъэрыр.
Республикэм исхэм ящыщу цIыху ­щитхум щIигъум гъэ къэс паллиативнэ дэIэ­пыкъуныгъэ ират. А IэнатIэр зэгъэ­щIылIауэ щытыну къудамэ республикэм и диагностикэ центрым къыщызэIуа­-хащ, Сабий унэм къыщызэрагъэпэщащ унагъуэхэм кIуэуэрэ сабий хьэлъэхэм узыр ящызыгъэпсынщIэ IэнатIэ.
ЗэIущIэм хэтащ КъБР-м узыншагъэр хъумэнымкIэ и министр Хъубий Марат, «Урысейм папщIэ» цIыхубэ фронт» урысейпсо жылагъуэ зэщIэхъееныгъэм и щIы­налъэ къудамэм и унафэщI Бакаев Евгений сымэ.

КъБР-м и Iэтащхьэмрэ Прави­тельствэмрэ я пресс-IуэхущIапIэ.