ТекIуэныгъэ Иным и махуэшхуэр гукъинэжу, щIэщы­гъуэу щекIуэкIащ Бахъсэн щIыналъэм. Абы зэдэууэ хэтащ цIы­хуищэ бжыгъэхэр, зэрахьэ къу­лыкъуи, я ныбжьи, зыщыщ лъэпкъи емылъытауэ. 

Накъыгъэм и 8-м, ТекIуэ­ныгъэ Иным и махуэм и пэ къихуэу, район администрацэм и Iэтащхьэ Балъкъыз Артур, КъБР-м и ЗАГС IэнатIэм и унафэщIым и къуэдзэ Шэрджэс Маринэ сымэ зыхэт гуп щыIащ Хэку зауэшхуэм и ветеранхэм ящыщу щIыналъэм псэууэ исыжхэм я деж. Ап­хуэ­дэхэщ ХьэтIохъущыкъуей къуа­жэм щыщ Кобылкин Иван Илья и къуэр, Крем-Константиновкэ жы­лэм щыпсэухэу Боженкэ Алексей Иван и къуэмрэ Боченков Василий Сергей и къуэмрэ. КъБР-м и Iэтащхьэ КIуэкIуэ Казбеки езыми къабгъэдэкIыу Балъкъызым фIы­щIэ ин яхуищIащ а нэхъы­жьыфIхэм, зэрахьа лIыгъэмрэ яхэлъа хахуагъэмрэ папщIэ. Ап­хуэдэу яритащ фэеплъ саугъэтхэр, удз гъэгъахэр. 
Махуэшхуэ пэкIум хэтыну зи мурадхэр щIыпIэ-щIыпIэхэм пщэ­д­джыжьым жьыуэ щызэхуэсу ­хуежьащ накъыгъэм и 9-м. Iуэхум хуэгъэщIэрэщIа Бахъсэн къалэр псом хуэмыдэжу екIут а махуэм. ЗэщIэбырыбэ шар гъэпщахэмрэ удз гъэгъахэмрэ дэхуарзэрт нып­хэр, къыхуеджэныгъэхэр зытет щэкI шэщIахэр. А псоми ящIы­гъужт гумрэ псэмрэ зэщIэзыIэтэ макъамэхэр, мамырыгъэм, зэгу­ры­Iуэныгъэм, лIыгъэм ятеухуа ­у­э­рэдхэр. 
Районым и IуэхущIапIэ къэс           къикIа лIыкIуэ гупхэр сыхьэти 8 нэужьым щызэхуэсу хуежьащ щIыпIэ администрацэм и гупэм къит утыкушхуэм. Куэд дэмы­кIыу абыхэм къахыхьащ къалэм щы­лажьэ IэнатIэхэм я лэжьакIуэхэ-ри. ЩIыпIэм и къулыкъущIэхэм нэ­мыщI, гупышхуэ зэрыгъэ­хъуахэм яхэтт орденхэмрэ медалхэмрэ зи бгъэгум щылыд нэхъыжьхэри, абыхэм папщIэ гуш­хуэныгъэ зи гум илъ щIалэгъуа­лэри, зи ­къуэрылъху-пхъурылъху цIы­кIу­хэр зи гъусэ адэшхуэ-анэш­хуэ­хэри. Абыхэм я нэхъыбапIэм яIыгът ­Хэку зауэшхуэм хэкIуэда е абы къикIыжу иужькIэ дунейм ехыжа я Iыхьлыхэм я сурэтхэр. ГурыIуэгъуэт ахэр «Полк уахъ­тын­шэм» хэтыну къызэрекIуэлIар. 
Хабзэ зэрыхъуати, щIыналъэм и унафэщIхэр зи пашэ гупыш-хуэм удз гъэгъахэр тралъхьащ Хэку зауэшхуэм хэкIуэдахэм я фэ­еплъу Ислъэмей жылэм дэ­тым. КъыкIэлъыкIуэу яублащ Те­кIуэныгъэ Иныр илъэс 74-рэ зэ­рырикъум папщIэ къызэрагъэ­пэща гуфIэгъуэ пэкIур. Ар и унафэм щIэтащ Бахъсэн къа­-лэм, Бахъсэн, Дзэлыкъуэ щIыналъэхэм я дзэ комиссар Сосналы Мухьэмэд. Къэралпсо гуфIэ­гъуэр Бахъсэн щIыналъэм щызыгъэлъэпIэну къекIуэлIахэм къахэщырт районым щылажьэ ку­-рыт школхэм я армеец ныбжьы­щIэ 600-м нэсыр, ХьэтIохъущы­къуей къуажэм дэт школ-интернат №1-м и кадетхэр. ЗауэлI фащэр зыщыгъ ныбжьыщIэхэр екIуу блэ­кIащ, щIыналъэ унафэщIхэм, ­зауэм и ветеранхэм, хьэщIэ лъапIэхэм фIэхъус ирахыу. 
Абыхэм къакIэлъыкIуэрт «Полк уахътыншэр». ЦIыху минхэр уэрамым ирикIуащ, Хэку зауэшхуэм хэкIуэда, абы псэууэ къикIыжу къэралым хьэлэлу илъэс куэдкIэ хуэлэжьэжа я благъэхэм, Iыхь­лыхэм я сурэтхэр лъагэу Iэтауэ яIыгъыу. 
- Нобэ зэрыкъэралу дгъэлъапIэ махуэшхуэр - Накъыгъэм и 9-р - адрей махуэшхуэхэм къыщхьэщокI пкърылъ лъапIэныгъэмрэ епха гупсысэмкIэ. Ар ипэжыпIэ-кIэ цIыхубэпсо махуэшхуэщ, нэпс­хэр къезыгъакIуэ икIи псэм дэрэжэгъуэ къезытщ, - жиIащ гуфIэгъуэ зэхуэсыр къыщызэIуихым Балъкъыз Артур. - Уасэшхуэ щIэттащ ТекIуэныгъэ Иным. Абы папщIэ я псэр ятащ ди цIыху ­мелуан 27-м нэсым. А фIыгъуэр къытхуэзыхьахэм я фэеплъыр мыкIуэдыжынщ. ПщIэрэ щIы­хь­рэ, фIыщIэ мыухыж яхудощI нобэ къыддэпсэу ди ветеран лъапIэхэм!
Бахъсэн щIыналъэм щыщу зауэш­хуэм хэтахэм зэрахьа лIыгъэхэм ятеухуат районым и ветеранхэм я зэгухьэныгъэм и тхьэмадэ Абазэ Анатолэ и къэп­- ­с­эл­ъэныгъэр. Абы жиIахэм пищащ Хэку зауэшхуэм и ветеран Кобылкин Иван. Абы игу къигъэкIыжащ мафIае илъэсхэр, къызэхуэсахэм мамырыгъэрэ зэпэщыныгъэрэ яIэну ехъуэ­хъуащ. 
Къалэм щекIуэкIа районпсо пэкIум къыдэкIуэу щIыналъэм къепха жылэхэми щагъэлъэпIащ ТекIуэныгъэм и махуэр. Бахъсэн къалэм ЩэнхабзэмкIэ и уардэунэм и гупэм къит утыкушхуэм щекIуэкIа гуфIэгъуэ зэхуэсыр къызэIуихащ щIыпIэ администра­цэм и Iэтащхьэ Мамхэгъ Хьэчим. Лениным и цIэр зезыхьэ къалэ уэрам нэхъыщхьэм щекIуэкIа гуфIэгъуэ Iуэхугъуэхэм я нэхъыщхьэт «Полк уахъытыншэм» и пэкIур. Мы гъэм абы хэтащ ­къалэдэсхэм ящыщу цIыху мин 26-м щIигъу. 
А махуэм и ныбжьыр илъэси ­100 ирикъуащ Хэжь Исуф, Бахъ­сэн къалэм и ветеранхэм ящыщу псэууэ къэна ветеран закъуэм. Мамхэгъ Хьэчимрэ абы и къу­э­дзэхэмрэ ехъуэхъуну абы и деж кIуащ икIи КъБР-м и Iэтащхьэ КIуэкIуэ Казбеки Бахъсэн къалэ округым и администрацэми ­къаб­гъэдэкI тыгъэхэр, ахъшэ сау­гъэт­хэр, удз гъэгъахэр иратащ. 
Бахъсэн щIыналъэм апхуэдэу щагъэлъэпIащ КъБР-м и РОСТО ДОСААФ-м къызэригъэпэща ­зауэ-хэкупсэ автомобиль зэдэжэр я щIыпIэм зэрынэсар. IэнатIэм и унафэщI ЗэкIуу Мухьэжид зи пашэ автомобилистхэм щIыхь ­хуащIу къащыIущIащ Дыгулыб­гъуей дэт курыт школ №7-м. 
 А зэIущIэхэр екIуэкIа нэужь, ­гуфIэгъуэхэм адэкIэ щыпащащ къалэ паркым. Абдеж концертышхуэ щекIуэкIащ, районым щыIэ творческэ гупхэм, артист ныбжьыщIэхэм я къарукIэ къы­зэ­рагъэпэщауэ. Апхуэдэу нэхъыжь­хэм къыхуащтащ ерыскъы щIэ­щыгъуэ зытелъ Iэнэ берычэт. 
«Къремыхъуж афIэкIа зы зауи, мамырыгъэмрэ зэгурыIуэны­гъэм­рэ я ныпым дыщIэту дрепсэу цIыхубэр!» - апхуэдэ гупсысэт, дауи, цIыхупсэми хьэуами щызекIуэр а махуэм.