Къабарты-Малкъарны Башчысыны къуллугъун болжаллы халда толтургъан Казбек Коков Дыгулыбгейни акъсакъаллары бла тюбешгенди. Жаш тёлюню иш бла жалчытыу, элде суу бла байламлы проблемаланы кетериу, жол, коммунал эмда иженер ызланы жангыртыу, социал магъаналы объектлени сюеу вопрослагъа къаралгъанды.
Тюбешиу къуралгъан элни маданият юйю аслам жылны тозурагъан халда турады. Ремонт ишлени бардырыргъа жюз миллион сом чакълы бир изленеди. Бахсанда Мамырлыкъ, маданият эмда солуу паркны къурулушун тамамлаугъа да къошакъ халда ырысхы керекди, бахчаны уллулугъу 28 гектардан артыкъ боллукъду. 4-чю номерли прогимназияны 540 жери барды, алай мектепге 649 сабий жюрюйдю, аны себепли школгъа дери билим берген къошакъ корпусуну ачылыуу да сюзюледи.
Андан ары жолоучулукъ «Текстиль индустрия» предприятиягъа болгъанды, анда ай сайын 200 тонна трикотаж къумач чыгъарылады. Ол проектде белгиленнген кючюне жетсе, производствону ёлчеми 600 тоннагъа дери боллукъду, ишчи жерлери 200-ге дери кёбейирикдиле.
Казбек Коков журтланы къурулуш программасы Революция атлы орамда къалай бардырылгъаны, жангы автостанцияны бла христиан храмны ишлениулери бла шагъырейленнгенди. Объектлени хайырланыугъа берилиулерини заман ёлчеми – 2020 жылны ахыры.
КъМР-ни Башчысыны къуллугъун болжаллы халда толтургъан мини-футболну спорт майданында да болгъанды, ол «Эльбрус» жер-жерли жамауат самоуправленияны эмда жер-жерли властьланы кючлери бла тапландырылгъанды. Бардырылгъан ишлеге юч миллион сом чакълы бир къоратылгъанды.
Жолоучулукъну эсеплерине кёре, Бахсан шахарны администрациясыны, профильли министерстволаны бла ведомстволаны таматаларына 2-чи номерли прогимназияда ясли группа блокну, 10-чу, 6-чы, 4-чю номерли орта билим берген мектеплени школгъа дери билим берген бёлюмлерин хайырланыугъа хазыр этерге, журт-коммунал иеликде бла шахарны тапландырыуда белгиленнген вопросланы тындырыргъа буюрулгъанды.
Муниципал жоллада – Панайоти, Угнич, Коков, 400-жыллыкъ, Эльбрусская, дагъыда бир ненча башха орамлада тынгылы ремонт ишле 2019 жылгъа белгиленнгенди. Ол жумушлагъа республикалы бюджетден 100 миллион сом субсидия бёлюнюрюкдю.