КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек щэкIуэгъуэм и 15-м яIущIащ «Урысейм и пашэхэр» урысейпсо зэхьэзэхуэм Къэбэрдей-Балъкъэрым щыщу щытекIуахэм.
ЗэIущIэм хэтхэм КIуэкIуэ Казбек щагъэгъуэзащ зэпеуэр зэрекIуэкIа щIыкIэм, зыIууа гугъуехьхэм, дяпэкIэ я мурадхэм, Къэбэрдей-Балъкъэрым и зыужьыны-гъэм сэбэп хуэхъуну къалъытэ я Iуэху еплъыкIэхэм.
- «Урысейм и пашэхэр» зэхьэзэхуэр ди зэманым икъукIэ мыхьэнэшхуэ зиIэ Iуэхуу къызолъытэ. Зэпеуэр уи зэфIэкI бгъэунэхунымкIэ IэмалыфIщ икIи гъэщIэгъуэнщ, - жиIащ Къумыкъу Аслъэнджэ-рий. - Зэхьэзэхуэм и кIэух Iыхьэхэр Псыхуабэ щекIуэкIати, пэжыр жыпIэмэ, Къэбэрдей-Балъкъэрым икIа гупым ехъулIэныгъэфIхэр абы къыщагъэлъэгъуащ. Нэхъыщхьэращи, зыр адрейм дэIэпыкъуэгъу хуэхъуу дызэрыIыгъыу дызэдэлэжьащ, нэгъуэщI щIыналъэхэм къикIа куэди абы къыдигъэцIыхуащ. Псори зэхьэзэхуэм пхымыкIами, ар дэтхэнэми дерсышхуэ хуэхъуащ.
Гилиев Мурат дыщIигъуащ зэхьэзэхуэр гукъинэж зэрыщыхъуар, апхуэдэ зэпеуэхэм хэтыну къыдэлажьэхэри и ныбжьэгъухэри къызэрыхуриджэр.
- Дауи, фыщыгъуазэ къыщIэкIынщ ди щIыналъэми иджыблагъэ зэрыщыдублам лэжьакIуэфI хъунухэр къыхэхыным теухуа «ЛъагапIэщIэ» зэхьэзэхуэр. Мыпхуэдэ зэпеуэхэм цIыхухэм зрагъэужь. Къапщтэмэ, абыхэм хэт къудей мыхъуу, IэщIагъэлIхэм я зэфIэкIыр къэзыгъэнаIуэ апхуэдэ лэжьыгъэ езы IуэхущIапIэхэми ирагъэкIуэкIыпхъэу къызолъытэ. Ди щIыналъэм и экономикэм зезыгъэужьын, зэфIэкI зиIэ цIыхухэр мы зэпеуэм къигъэлъэгъуэнущ икIи сыщогугъ абыхэм гуп лъэщ къахэкIыну, - жиIащ КIуэкIуэ Казбек.
КъБР-м и Iэтащхьэм и къалэнхэр пIалъэкIэ зыгъэзащIэм и Администрацэм и УнафэщI Къуэдзокъуэ Мухьэмэд зэIущIэм кърихьэлIахэр щигъэгъуэзащ «ЛъагапIэщIэ» зэпеуэм хэтыну мы зэманым ирихьэлIэу цIыху мини 4-рэ ныкъуэм щIигъум зэрызрагъэтхар.
КIуэкIуэм зэIущIэм хэтхэр къыхуриджащ «ЛъагапIэщIэ» зэхьэзэхуэми я зэфIэкI щеплъыжыну. Абы къыхигъэщащ «Урысейм и пашэхэр» урысейпсо зэхьэзэхуэм щытекIуахэр къулыкъу зыхуэбгъэфащэ хъуну гупым зэрыхагъэхьэнур.
