Къэбэрдей-Балъкъэрымрэ Тулэ областымрэ я зэдэлэжьэныгъэм зеубгъу. КIуэкIуэ Юрий зи пашэ делегацэр республикэм икIри а щIыналъэм кIуащДелегацэм хэтщ министерствэхэм, ведомствэхэм, сату-промышленнэ палатэм, хьэрычэт Iуэхур дэIыгъынымкIэ фондым, промышленностым, ухуэныгъэм, мэкъумэш хозяйствэм, сырьем елэжь IэнатIэм, курортымрэ туризмэмрэ я IуэхущIапIэхэм я унафэщIхэр, бизнесым и лIыкIуэхэр. ЛIыкIуэхэр а щIыналъэм щыщыIэну лъэхъэнэм областым и IуэхущIапIэ инхэм еплъынущ, апхуэдэу лъэныкъуитIми я экономикэ, инвестицэ зэфIэкIхэр утыку къралъхьэнущ. КъБР-м и Iэтащхьэмрэ Тулэ областым и губернаторымрэ я зэIущIэм щытепсэлъыхьащ лъэныкъуитIми я сэбэп зыхэлъ Iуэху куэдым. КIуэкIуэ Юрий Дюмин Алексей фIыщIэ хуищIащ КъБР-м и лIыкIуэхэр зэрыригъэблэгъам икIи хьэщIагъэ къазэрырихам папщIэ. Тулэ областым, жиIащ КIуэкIуэ Юрий, Урысейм и щIыналъэ нэхъ зызыужьахэм ящыщщ. Тулэ зыхъумэжыныгъэм телажьэ промышленнэ комплексым и предприятэ инхэр дэтщ, щIэупщIэшхуэ зиIэ, дуней псом къыщыщIагъэкIхэм фIагъкIэ къакIэрымыху продукцэ щагъэхьэзыр. Къэбэрдей-Балъкъэрым щIыналъэм ирищэфынущ электроэнергетикэм къыщагъэсэбэп иджырей Iэмэпсымэхэр, налмэс Iэмэпсымэ зэмылIэужьыгъуэхэр, медицинэм къыщагъэсэбэп техникэр. ИджыпстукIэ областым ещэху рентген Iэмэпсымэхэмрэ кабель продукцэмрэ. Апхуэдэу лъэныкъуитIыр зэдэлэжьэфынущ нэгъуэщI къэралхэм кърашхэм фIагъкIэ къакIэрымыху ерыскъыпхъэхэр къэлэжьынымкIэ. ЛъэныкъуитIми я сэбэп хэлъынущ туризмэм зегъэужьыным, цIыхухэм я узыншагъэр щрагъэфIакIуэ курортхэмрэ санаторэхэмрэ къагъэсэбэпыным. ХэкIыпIэ инхэр щыIэщ Тулэ и промышленнэ компание инхэм я IуэхущIапIэхэр республикэм къыщызэIухынымкIэ. Ди щIыналъэм и Iэтащхьэм къыхуэгъэзауэ губернаторым къыхигъэщхьэхукIащ: «Уэ уи унафэм щIэту нобэ Iуэху инхэр экономикэм, мэкъумэш хозяйствэм щызагъэфIагъэкI. Зыужьыныгъэм и хэкIыпIэ лъэщхэм ящыщщ туризмэр. Апхуэдэу ди дежкIэ дэIэпыкъуэгъу хъунущ лъэпкъ хабзэхэр хъумэным теухуауэ иджыпсту фиIэ лэжьэкIэр». Дюмин Алексей жиIащ зэдэлэжьэныгъэм и унэтIыныгъэ нэхъыщхьэ-хэм ящыщу промышленнэ кооперацэр зэрыувыфынур, абы и лъэныкъуэкIэ КъБР-м щыIэ зэфIэкIхэри къэбгъэсэбэп зэрыхъунур. Губернаторым къигъэлъэгъуащ бизнесым, щэнхабзэм, егъэджэныгъэм, щIалэгъуалэ политикэм яхуэгъэзауэ лъэныкъуитIри зэщIыгъуу зэлэжьыфынухэр куэд зэрыхъур. А махуэ дыдэм Iэ щIадзащ 2018 гъэм Сочэ щекIуэкIа Урысей инвестицэ зэхыхьэшхуэм хиубыдэу Къэбэрдей-Балъкъэр Республикэмрэ Тулэ областымрэ зэращIылIа зэгурыIуэныгъэр гъэзэщIэнымкIэ зэфIэгъэкIыпхъэхэм. ЛъэныкъуитIми къагъэлъэгъуащ Къэбэрдей-Балъкъэрымрэ Тулэ областымрэ яку дэлъ зэгурыIуэныгъэхэр гъэбыдэнымкIэ мы Iуэхум мыхьэнэшхуэ зэриIэнур.
Поделиться: ЧИТАТЬ ТАКЖЕ:
|