Орус география биригиуню «Альтаир» жаш тёлю клубундан беш къыз жаш аскерчини Росгвардияны КъМР-де Управлениясы Михаил Калашниковну  100-жыллыгъына атап къурагъан юйрениулерине къатышхандыла. Аланы барысыны да альпинист сынаулары бар эди. Алай бла жаш аскерчилеге   энчи буйрукъла толтургъан «Элбрус» отрядны офицерини таматалыгъында юч кюнню ичинде сауутла бла хайырланыргъа, душман кёрмезча бугъунуп бир жерден башхасына ётерге,  тартылгъан бауну болушлугъу бла жардан ётерге эм кёп башха къыйын жумушла толтурургъа тюшгенди. 

Отрядха башчылыкъ этген офицер юйрениуледен сора анга къатышханла битеу салыннган борчланы бет жарыкълы толтургъанларын, командирлени айтханларына бойсуна билгенлерин эмда кёп жангы затлагъа юйреннгенлерин чертгенди.  Орус география биригиуню жаш къаууму бла быллай акцияла энтта бардырыллыкъларын билдиргенди.

«Элбрус» отрядны башчысы полицияны полковниги  Сергей Кочка къызлагъа эсде къаллыкъ саугъала бергенди. «Сиз битеу салыннган борчланы толтургъансыз, тёзюмюгюз, аскерчи кючюгюз болгъанларын кёргюзтгенсиз. Ёсюп келген тёлю саулукълу, къарыулу, чыдамлы болгъанлары бек къууандырады»,-дегенди ол.