КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек ­хэтащ УФ-м Кавказ Ищхъэрэм и Iуэху­хэмкIэ и министерствэм 2018 гъэм зэфIагъэкIахэмрэ 2019 гъэм къапэщытхэм ятеухуауэ мэлыжьыхьым и 18-м ЕсэнтIыгу щызэхиша зэхуэсышхуэм.

ЗэIущIэр къызэIуихри, абы къы­щып­сэлъащ УФ-м и Правительствэм и Уна­фэщIым и къуэдзэ Мутко Виталий. Вице-премьерыр къытеувыIащ КИФЩI-м хыхьэ щIыналъэхэм социально-экономикэ и лъэныкъуэкIэ я Iуэху зыIутхэм. ЩIыналъэм хыхьэ хэгъэгухэм цIыхуу къыщалъ­хум щыхэхъуэ зэпыту зэрекIуэкIыр, лIэ­хэр нэхъ мащIэу, къалъхухэр нэхъыбэу зэ­рыщытыр, апхуэдэуи цIыхухэр нэхъы­бэрэ псэу зэрыхъуар къыхигъэщащ, зы­зыужьа къэралхэм щыIэ мардэм абы и лъэныкъуэкIэ зэрынэсари жиIащ. Абы къыдэкIуэуи, къулыкъущIэм къыхигъэщащ сабийуэ дунейм ехыжхэм я бжыгъэмкIэ Кавказ Ищхъэрэм Урысейм бжьы­пэр зэрыщиIыгъыр, иужьрей илъэсхэм ар нэхъ мащIэ хъуами.
УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Матовников Александр къыхигъэщащ министерствэмрэ Полпредствэм и Аппаратымрэ зэрызэ­дэ­лажьэм къэралым и УнафэщIымрэ Правительствэмрэ къагъэув къалэнхэр псын­щIэу гъэзэщIэнымкIэ Iэмал къы­зэритыр.
2018 гъэм щIыналъэм и социально-экономикэ IэнатIэхэм зэрызаужьам теу­хуа бжыгъэхэм къызэрагъэлъагъуэм­- кIэ, промышленностым къыщIигъэкIхэм, мылъку нэхъыщхьэм инвестицэу къыхалъхьэм хохъуэ, лэжьапIэншэхэм я бжыгъэр нэхъ мащIэ мэхъу.
А псом къадэкIуэу, абы и лъэныкъуэкIэ Iуэху пыухыкIахэр зэрызэфIагъэкIым щхьэкIи къэмынэу, щIыналъэм щып­сэухэм я улахуэхэр къэрал псом щынэхъ мащIэ дыдэщ, лэжьапIэншэхэм я бжыгъэр щынэхъыбэ дыдэщ, зи IэщIагъэм хэзыщIыкI IэщIагъэлIхэри хуабжьу къащомэщIэкI.
Матовниковым зэрыжиIамкIэ, министерствэмрэ властым и щIыналъэ органхэмрэ я гулъытэ нэхъыщхьэр зыхуэгъэзауэ щытыпхъэр а гугъуехь­хэрщ.
2018 гъэм зрагъэхъулIахэмрэ ды­зэрыт илъэсым къапэщыт къалэнхэмрэ ятеу­хуауэ а зэхуэсым къы­щып­сэлъащ Урысейм Кавказ Ищхъэрэм и IуэхухэмкIэ и министр Чеботарёв Сергей. УнафэщIым жиIащ КИФЩI-м ­зегъэужьыным хуэгъэпса къэрал прог­раммэм мы зэманым ирихьэлIэу инвестицэ проект 22-рэ зэрыхагъэхьар. 2019 гъэм къалэн нэхъыщхьэу щытынур зыужьыныгъэм хуэ­лажьэ урысей институт псори, банк IэнатIэри, нэ­гъуэщI къэралхэм щыщу щIы­налъэм зи мылъку къыхэзылъхьэну ­хуейхэри Iуэхум нэхъ жыджэру къыхэ­шэнырщ. Нэхъапэ игъэщыпхъэхэм ящыщу къо­нэ мэкъумэш, туризм IэнатIэхэм, зыщагъэхъуж-зыщагъэпсэху IуэхущIа­пIэхэм зегъэужьыныр.
ЗэIущIэм хэтащ Урысейм и Прези­дентым и Администрацэм, федераль­нэ министерствэхэмрэ ведомствэхэмрэ я лIыкIуэхэр, Къэрал Думэм и депутатхэр, УФ-м и Федеральнэ Зэхуэсым ФедерацэмкIэ и советым хэтхэр.