Махуэку кIуам Налшык щызэхэтащ КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ К. В., Егъэджэныгъэмрэ щIэныгъэмкIэ IэнатIэм кIэлъыплъынымкIэ федеральнэ къулыкъу-щIапIэм и унафэщI Кравцов С. С. сымэ зыхэта республикэ зэIущIэ. Ар теухуауэ щытащ Зыуэ щыт къэрал экзаменыр егъэкIуэкIыным Къэбэрдей-Балъкъэ- рым и зыхуэфащэ IуэхущIапIэхэр зэрыхуэхьэзыр щIыкIэм.
КIуэкIуэ Казбекрэ Кравцов Сергейрэ Егъэджэныгъэмрэ щIэныгъэмкIэ IэнатIэм кIэлъыплъынымкIэ федеральнэ къулыкъущIапIэм и лIыкIуэхэу абы щIыгъу IэщIагъэлIхэмрэ фIыщIэ яхуищIащ экзаменыр егъэкIуэкIыным сыт щыгъуи гулъытэшхуэ зэрыхуащIым папщIэ.
Къэбэрдей-Балъкъэрым и Iэтащхьэм и къалэнхэр пIалъэкIэ зыгъэзащIэм къигъэуващ кIэух аттестацэр абыхэм ехьэлIауэ щыIэ мардэхэм тету, зэIухауэ, нэфI-ней хамылъхьэу къызэрагъэпэщыну.
ЕГЭ-м кърикIуэхэм, къыхигъэщащ КIуэкIуэ Казбек, наIуэ къащIынущ егъэджэныгъэм гулъытэ нэхъыбэ зыхуэщIыпхъэу иIэ щIыпIэхэр икIи республикэм и школхэм защIэгъэкъуэным теухуа программэми лъабжьэ хуэхъунущ: «Дэ ди мурадщ Зыуэ щыт къэрал экзаменым кърикIуахэр зэпэтлъытыжыну, еджакIуэхэм ягъуэт щIэныгъэм дяпэкIэ хэдгъэхъуэн щхьэкIэ, а Iуэхум зэдгъэзэхуэжыпхъэу хэлъхэр наIуэ къэтщIын, зыхуэфащэ унафэ тэмэмхэри къэтщтэн папщIэ. Муниципальнэ зэгухьэныгъэхэм я Iэтащхьэхэм захузогъазэ абы теухуауэ ныбжьыщIэхэм я адэ-анэхэм епсэлъылIэну. Псори дызэдевгъэгугъу еджапIэхэр къэзыуххэр щыдмыгъэуэным, щыIэ хабзэхэр, мардэхэр къызэпаудыным ахэр едмыгъэувэлIэным».
«Рособрнадзор»-м и унафэщI Кравцов Сергей Къэбэрдей-Балъкъэрыр 2019 гъэ ЕГЭ-м хуэхьэзыру къилъытащ: «УпщIэ зыри къыхэкIыркъым, дэтхэнэри хабзэм тетмэ, егъэджэныгъэм и фIагъым хэхъуэмэ, сабийхэмрэ абыхэм я адэ-анэхэмрэ псори захуагъэм зэрытетыр, псоми зэхуэдэ Iэмалхэр зэраIэр къагурыIуэмэ. Абы къегъэлъагъуэ дэ тщыщ дэтхэнэ зыми, щIыпIэхэм щыIэ къызэгъэпэщакIуэхэм, техникэ IэщIагъэлIхэм, жэуаплыныгъэу тхэлъыр зыхуэдизыр. Къэпщытэныгъэм зыхуэгъэхьэзырыныр накъыгъэм и 14-м и пэ къихуэу зэфIэгъэкIын хуейщ. Дэ республикэм щIэгъэкъуэн дыхуэхъунущ зыхуэныкъуэ методикэ, къызэгъэпэщыныгъэ Iуэху я лъэныкъуэкIэ».
ЗэIущIэм къыщыхалъхьа Iуэхухэм теухуауэ абы къыщыпсэлъащ Егъэджэныгъэмрэ щIэныгъэмкIэ IэнатIэм кIэлъыплъынымкIэ федеральнэ къулыкъущIапIэм и унафэщIым и къуэдзэ Музаев А. А., Егъэджэныгъэмрэ щIэныгъэмкIэ IэнатIэм кIэлъыплъынымкIэ федеральнэ къулыкъущIапIэм къэрал кIэух аттестацэр къызэгъэпэщынымрэ ар егъэкIуэкIынымкIэ и управленэм и унафэщI Круглинский И. К., КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Къумыкъу I. М. сымэ.
Зыуэ щыт къэрал экзаменыр мы гъэм Къэбэрдей-Балъкъэрым щатынущ школхэм я еджакIуэ 4800-м щIигъум.