Нальчикде КъМР-ни Башчысыны къуллугъун болжаллы халда толтургъан К.В. Коков, Билим бериу эмда илму бёлюмге къарау жаны бла федерал службаны таматасы С. С. Кравцов да  къатышып  Къабарты-Малкъарда Бир къырал экзаменнге хазырланыу, аны бардырыу вопросла бла байламлы республикалы кенгеш къуралгъанды.
Казбек Коков экзамен кампанияны къураугъа не заманда да энчи эс бёлген Сергей Кравцовха эмда аны биргесине келген Рособрнадзорну келечилерине ыразылыгъын билдиргенди. КъМР-ни Башчысыны къуллугъун болжаллы халда толтургъан  эсеп къырал аттестацияны излемлени низамындан чыкъмагъанлай, ачыкъ халда бардырылырча онгланы къураргъа  тийишлисин чертгенди.
ЕГЭ-ни эсеплери, деп чертгенди Казбек Коков,  билим бериу системада проблемаланы ачыкъларгъа болушурукъдула эмда ала республиканы школларына билеклик этиу программаланы мурдорларын къурарыкъдыла: «Биз Бир къырал экзаменни  тюз эсеплерин чыгъарыр умутлубуз, мындан арысында  окъуучуланы билимлерин ёсдюрюу ишни тапландырырча, ол жаны бла тийишли оноула жашауда  тындырылырча. Муниципал къуралыуланы таматаларындан ата-анала бла ангылатыу  иш бардырырларын излейме. Выпускникле жангылып, бузукълукъла этмезча бирден кюч салайыкъ».
Рособрнадзорну оноучусу Сергей Кравцов Къабарты-Малкъарны  ЕГЭ- 2019 бардырыргъа хазырлыгъына ыразы болгъанды: «Низам болса, билим бериуню даражасы кётюрюлсе, сабийле, ата-анала да хар  инсан экзаменде  бирча, тюз халлы болумлада боллукъларын толу ангыласала, соруула чыкъмайдыла. Ол хар бирибизни, къураучуланы, жер-жерледе техника специалистлени, жууаплылыгъыбызды. 
Битеу хазырланыу жумушла 14 майгъа дери тамамланып бошалыргъа тийишлидиле. Биз да кесибизни  жаныбыздан республикагъа керекли методика эмда къурау жаны бла болушлукъ тапдырлыкъбыз».
Кюнню повесткасыны баш вопросуна кёре, докладла бла  Билим бериу эмда илму бёлюмге къарау жаны бла федерал службаны таматасыны орунбасары А.А. Музаев,  Билим бериу эмда илму бёлюмге къарау жаны бла федерал службаны Эсеп къырал аттестацияны къурау эмда бардырыу  управлениясыны  оноучусу И.К. Круглинский, КъМР-ни жарыкъландырыу, илму эмда жаш тёлюню ишлери жаны бла министри А.М. Кумыков сёлешгендиле.
Бир къырал экзаменни 2019 жылда Къабарты-Малкъарны  школларыны 4800-ден аслам окъуучусу берликдиле.