КъМР-ни Башчысыны къуллугъун болжаллы халда толтургъан Казбек Коков РФ-ни Шимал Кавказны ишлери жаны бла министерствосуну Ессентукда бардырылгъан коллегиясына къатышханды. Анда ведомствону 2018 жылда ишини эсеплери сюзюлгендиле эмда быйылгъа борчла салыннгандыла.
Аны РФ-ни Правительствосуну Председателини орунбасары Виталий Мутко ачханды. Ол СКФО-ну регионларыны социал-экономика кёрюмдюлерине энчи эс бургъанды. Битеу субъектледе да халкъны санына къошула баргъанын, сабийле кёп туугъанларын, ёлгенле азайгъанларын эмда адамланы ёмюрлери узайгъанын, ол айныгъан къыраллада ёлчемге жетгенин белгилегенди. Аны бла бирге Шимал Кавказда ауушхан сабийлени саны, арт жыллада бир кесек азайгъан эсе да, Россейде бек уллуладан бирине саналгъаны да эсгертилгенди.
РФ-ни Президентини СКФО-да толу эркинликли келечиси Александр Матовников а сёзюнде Шимал Кавказны ишлери жаны бла министерствону полпредни аппараты бла бирге ишлеую хайырлы болгъанын, къырал башчы бла правительство салгъан борчланы терк да, тынгылы да толтурургъа онг бергенин айырып айтханды. Болсада, тюрлю-тюрлю мадарла этилгенлерине да къарамай, округда иш хакъны ёлчеми бек гитчеледен бириди, ишсизлени саны уа къыралда бек уллулай къалады, уста, сынаулу специалистле да жетишмейдиле. Ма ол проблемалагъа, деп чертгенди Александр Матовников, министерство бла регион властьла артыкъда уллу эс бурургъа керекдиле.
Россейни Шимал Кавказны ишлери жаны бла министерствосуну 2018 жылда ишини эмда быйылгъа къаллай борчла белгиленнгенлерини юсюнден ведомствону таматасы Сергей Чеботарёв билдиргенди. Ол СКФО-ну Айнытыуну къырал программасына кёре бюгюнлюкде 22 инвестпроект къабыл кёрюлгенин, 2019 жылда банкланы ишлерин игилендириуге, тыш къыраллы инвесторланы санын кёбейтиуге, айныуну битеу институтларын тирилтиуге энчи эс буруллугъун айтханды. АПК-ны, туризмни, санаторий-курорт комплексни айнытыу баш борчладан бирлери болгъанлай къаладыла, дегенди.
Кенгешге Россейни Президентини Администрациясыны, федерал министерстволаны бла ведомстволаны келечилери, РФ-ни Федерал Жыйылыууну Къырал Думасыны депутатлары, Федерация Советини членлери къатышхандыла.