Бахъсэн къалэм дэт  6-нэ курыт еджапIэм мэлыжьы­хьым и 15-м щекIуэкIащ Iуэхугъуэ дахэ. «Культур много - Россия одна» зыфIаща лъэпкъ фестивалым кърихьэлIат ди гъунэгъу щIыналъэхэм къикIа хьэщIэ лъапIэхэр, къулыкъущIэхэр, Бахъсэн къалэм и курыт еджапIэхэм я лIыкIуэхэр. 
 Лъэпкъ зэныбжьэгъугъэм, гуапагъэм, зэгурыIуэныгъэм я щапхъэ егъэлъагъуэ лъэпкъи 10-м къыхэкIа ныбжьыщIэхэр зыщIэс мы еджапIэм. Адыгэ, урыс, балъкъэр, осетин, шэшэн, дагъыстэн, адыгей, куржы, цыджан, узбек сабийхэр щеджэ школым игъэхьэзыра, иригъэкIуэкIа фестивалыр гъэщIэгъуэну зэхэлът. Щхьэж и лъэпкъ ныпыр иIыгъыу, лъэпкъ фащэкIэ хуэпауэ, лъэпкъ макъамэр къеуэу утыку къихьа еджакIуэхэмрэ абыхэм я адэ-анэхэмрэ ягъэхьэзыра къафэхэм еплъыну, уэрэдхэм щIэдэIуну зыкърагъэхьэлIат Бахъсэн къалэ округым и администрацэм и Iэтащхьэ Мамхэгъ Хьэчим, абы и къуэдзэхэу Къардэн ФатIимэрэ Джатэ Ильясрэ, КъБР-м егъэджэныгъэмкIэ, щIэ­ныгъэмрэ щIалэгъуалэм я IуэхухэмкIэ и министерствэм и лIыкIуэ КIагуэ Iэминат, Шэшэн Республикэм и лIыкIуэхэр, нэгъуэщIхэри. 
- Мы фестивалым мыхьэнэшхуэ иIэу къызолъытэ, - жи­Iащ Мамхэгъым. - Псоми дощIэ Урысей Федерацэм лъэпкъ куэд зэрыщыпсэур. Тхыдэм дызытригъэува лъагъуэм илъэсищэ бжыгъэ хъуауэ дытемыкIауэ дыкъогъуэгурыкIуэ. Дэ дызэгурымыIуэмэ, дызэрымыIыгъмэ, къэралыр щэщэжынущ. Дызэрыкуэдырщ дызыгъэдахэри. Щхьэж и лъэпкъ тхыдэр щымыгъупщэу, и щэнхабзэр IэщIыб имыщIу, и бзэмрэ и хабзэрэ IэщIэмыхуу дыпсэуфынущ. Ар къызыгурыIуэ псоми фIыщIэ фхузощI. 
 Фестивалыр ягъэдэхащ мы школым щеджа, уэрэ­джы­IакIуэ цIэрыIуэ Мэремыкъуэ Резуан, «Бахъсэн ауз» къэфакIуэ гупым, Лосэн Тимур зи унафэщI «Бзэрабзэ» гупым. 
 АдэкIэ дэтхэнэ лъэпкъми игъэхьэзыра пщIантIэр ягъэлъэгъуащ, я шхыныгъуэхэр, макъамэ Iэмэпсымэхэр щыIэу. ГуфIэгъуэ зэIущIэм къекIуэлIахэм я нэгу щIэкIа псори ягъэщIагъуэу махуэр екIуэкIащ.