РФ-ни Президентини Шимал-Кавказ федерал округда толу эркинликли келечиси Александр Матовников бла КъМР-ни Башчысыны къуллугъун болжаллы халда толтургъан Казбек Коков тюнене Правительствону юйюнде белгили россейли спортчула бла тюбешгендиле. Аланы арасында UFC турнирни чемпиону Хабиб Нурмагомедов, кикбоксингден дунияны тёрт кере чемпиону Вагиф Абдулаев, спорт самбодан дунияны тёрт кере чемпиону Виталий Минаков, Россейни сыйлы тренери Абдулманап Нурмагомедов, боксдан WBO 2013-2014 версиягъа кёре чемпион Руслан Проводников, Арктиканы тинтиуге себеплик этген «Шимал десант» ассоциацияны келечиси Дмитрий Гришин бар эдиле.
Спортну усталарыны жетишимлерине тийишли багъа бере, Александр Матовников аланы халкъла аралы эришиуледе кёргюзтген батырлыкъларын, профессионал сынауларын белгилегенди. Ол бюгюнлюкде Шимал Кавказда да спортну айнытыугъа энчи эс бурулгъанын айтханды, алай ол хайыр келтирир ючюн а, спортчула бла дайымда байламлыкъла жюрютюлюрге кереклисине эс бургъанды.
Полпред Шимал-Кавказ федерал округда Жамауат советде белгили спортчуладан  энчи ишчи къауум къурауну дурус кёргенди. Ол а ёсюп келген тёлюню физкультура эм спорт бла кюреширге кёллендирликди, саулукълу жашау этиуню ниетин жаяргъа болушурукъду.
Казбек Коков, къонакъланы алгъышлай, алагъа къол тутушуудан  «Жаш тёлю терроризмге къажауду» деген турнирни ачылыууна къатышханлары ючюн ыразылыгъын билдиргенди эмда мындан ары да жетишимле тежегенди.
Спортчула уа асламланы физкультура бла кюреширге кёллендириуню амалларыны юслеринден айтхандыла эмда быллай тюбешиулени терк-терк бардырыргъа кереклисин чертгендиле.