|
Утыкур зыгъэдахэхэр
10 апреля, 2019 - 06:10
Мэлбахъуэ Тимборэ и цIэр зезыхьэ Лъэпкъ библиотекэм Театрым и илъэсым ехьэлIа зэIущIэ гуапэ щекIуэкIащ. «Дискуссионная площадка: читаем, смотрим, обсуждаем. Диалог актёра и зрителя» зыфIаща пшыхьым кърагъэблэгъат Къэбэрдей-Балъкъэрым и Музыкэ театрым и лэжьакIуэхэр, ахэр щIэджыкIакIуэ ныбжьыщIэхэм хуагъэзэн, зэрагъэпсэлъэн папщIэ. Ар къызэрагъэпэщащ библиотекэм щеджэ и пэшымрэ гъуазджэхэмкIэ къудамэмрэ я унафэщIхэу, КъБР-м щIыхь зиIэ и лэжьакIуэхэу Сэкрэк Заремэрэ КIуж Заремэрэ.
«Зи щIыхьыр ин - театр!» жиIэу блыным тетхащ, абы ищхьэкIэ щыфIэдза экран иным къытещ псалъэхэм: «Театрыр фIы куэд дунейм зэрыжепIэ хъун Iэмалщ» (Гоголь Николай) театрым и мыхьэнэм урагъэгупсыс.
ЗэIущIэхэр езыгъэкIуэкIа Геграевэ Зейнафрэ Нанэ Ларисэрэ къызэхуэсахэр щагъэгъуэзащ ди республикэм и театр гъуазджэм и тхыдэм, Музыкэ театрым и япэ спектаклхэр щагъэлъэгъуауэ щыта, абы и лъабжьэу къэплъытэ хъуну Къэбэрдей драмэ театрым, Балъкъэр лъэпкъ театрым я къекIуэкIыкIам. КIэщIу и гугъу ящIащ Музыкэ театрым и труппэхэм, абыхэм я лэжьакIуэ пажэхэм я гъащIэмрэ я гуащIэмрэ, нэгъуэщI куэдми. АдэкIэ абыхэм я цIэ къраIуащ я хьэщIэ лъапIэхэм: Музыкэ театрым и режиссёр, КъБР-м гъуазджэхэмкIэ щIыхь зиIэ и лэжьакIуэ Сафаровэ Тамарэ, ди республикэм щIыхь зиIэ и артисткэхэу Шэрджэс Iэсиятрэ Мамбэт Мадинэрэ, театрым и уэрэджыIакIуэхэу Мэз Джульеттэрэ Белоцерковская Дианэрэ.
Режиссёрым и лэжьыгъэм гъэщIэгъуэну хэлъым тепсэлъыхьащ Сафаровэр. Драмтеатрым и актёрхэм нэхърэ Музыкэ театрым ейхэр куэдкIэ нэхъ гугъу зэрехьыр жиIащ, зэрыджэгум хуэдэурэ уэрэд жаIэн, а тIур екIуу зэщIагъэувэн хуей зэрыхъум къыхэкIыу. «Ди республикэм щыкуэду схужыIэнукъым театрыр фIыуэ зылъагъухэр, ди жагъуэ зэрыхъунщи, - къыхигъэщащ Тамарэ. - 60 гъэхэм, иджыри сысабийуэ, слъэгъуауэ си нэгу къыщIэнащ дэкIуеипIэхэм тесу спектаклхэм цIыхухэр еплъу зэрыщытар. А зэманым къытхуегъэгъэзэжынуи къыщIэкIынукъым».
Театрыр фIыуэ зылъагъухэм, абы и лэжьыгъэм хэлъ щхьэхуэныгъэхэм зыщызыгъэгъуэзэну хуейхэм я упщIэхэр нэхъыбэу зыхуэгъэзар артисткэхэм, уэрэд-жыIакIуэхэм я унэтIакIуэ режиссёрырат. Тамарэ абыхэм гупсэхуу, удихьэхыу жэуап къритырт. «Фи актёрхэм я зэфIэкIыр адрей щIыналъэхэм ейхэм елъытауэ сыт хуэдэ?» упщIэм и жэуапу абы жиIащ я лэжьакIуэхэр зыпэмылъэщынрэ щымыджэгуфын спектаклрэ зэрыщымыIэр. Дэнэ щIыпIэ мыкIуами, щытхъу къызэралэжьри къыхигъэщащ.
- НэгъуэщI щIыпIэ сыщрагъэблэгъаи къэхъуащ, псалъэм папщIэ, Мэхъэчкъалэ. Ауэ сэ зэи си гупыр къэзгъанэу нэгъуэщI щIыпIэ сыкIуэнукъым, - жеIэ Тамарэ. - Зыхэслъхьэ щымыIэ си Iуэхум гукъыдэж къызет, гугъэзэгъэгъуэ хызолъагъуэ. Оперэр сфIэфIщ, лъагъуныгъэр зи лъабжьэ балетри си гум дохьэ, опереттэри си хамэкъым. ЖыпIэнурамэ, кIуапIи жапIи симыIэу театрым сызыщIиубыдащ.
Артист бзылъхугъэхэм Iэмал яIащ я гукъэкIыжхэм щыщхэр къызэхуэсахэм хуаIуэтэну, я мурадхэм щагъэгъуэзэну, я макъ гуакIуэм щIагъэдэIуну. Шэрджэс Iэсият псалъэ щратым, къыщыщIауэ щытахэр жиIэжри, пшыхьым къекIуэлIахэм я гукъыдэжыр къиIэтащ. Абы и псалъэхэм пищэу Мамбэт Мадини жиIэжащ хъыбар кIэщI.
Артисткэхэм ягъэзэщIащ спектаклхэм щыщ ариехэр, лъэпкъ уэрэдхэр, совет композиторхэм я IэдакъэщIэкI цIэрыIуэхэр - сыт хуэдэ макъамэ лIэужьыгъуэми зэрыхуэIэкIуэлъакIуэр наIуэ къащIу. СыхьэтитIым нэблагъэкIэ екIуэкIа зэIущIэр абы щIэсахэм гукъинэж зэращыхъуам шэч хэлъкъым.
ИСТЭПАН Залинэ. Сурэтхэр Къарей Элинэ трихащ.
|
20.04.2024 - 12:25 Къэрал куэдым мэлыжьыхьым и 19-р «Ажэгъуэмэм и махуэу» щагъэлъапIэ. Абы гулъытэ хэIэтыкIа хуэщIыпхъэу къалъытэу, япэ дыдэу, I984 гъэм, Iуэхур къыщрахьэжьар Инджылыз къэралыгъуэрщ. |
|
20.04.2024 - 09:03 Къэбэрдей-Балъкъэр Республикэм мы гъэм еханэу щекIуэкIынущ «ТекIуэныгъэм и диктанткIэ» зэджэ, гъэсэныгъэ мыхьэнэшхуэ зиIэ Iуэхугъуэ щхьэпэр. |
|
19.04.2024 - 09:01 Тамбукъан гуэл шыугъэм илъэс 700 тхыдэ къызэринэкIащ. Абы ит псыр ижыркъым, мыл ткIужхэмрэ уэшххэмкIэ ирикъуу аращ. Абыхэм къадэкIуэу ябрууауэ щыта жапIэхэмкIэ абы хохъуэ минеральнэ псы. |
|
19.04.2024 - 09:01 2024 гъэм и япэ мазищым къызэрагъэлъагъуамкIэ, хьэщIэщым къыщыувыIэну махуэу зыщрагъэтхамрэ абы щыщIэтIысхьа махуэмрэ я зэхуакум дэлъ пIалъэм и кIыхьагъымкIэ Къэбэрдей-Балъкъэрым къэралым и щIыналъ |
|
18.04.2024 - 12:25 2024 гъэм и япэ мазищым къриубыдэу Къэбэрдей-Балъкъэрым зыщызыплъыхьыну къэкIуа туристхэм я бжыгъэр мин 398-рэ хъуащ икIи ар процент 24,8-кIэ нэхъыбэщ къапщытэж лъэхъэнэм ирихьэлIэу нэгъабэ щыIа бж |
|