Къабарты-Малкъарда «Россейли Кавказ бла шагъырейлениу» деген экинчи  вузла  аралы  жаш тёлю  форум бардырылгъанды.  Анга 15 къыралдан келип, Москвада Халкъла аралы халланы къырал институтунда, Ингушетияны къырал университетинде окъугъан студентле эмда преподавательле къатышхандыла. Ала республикагъа шабат кюн келгендиле. Ыйых кюн а аланы Нальчикде, Минги тауну тийресинде да айбат жерлеге элтгендиле.
Баш кюн а къонакъла  КъМКъУ-да бардырылгъан  конференциягъа къатышхандыла. Аланы окъуу юйню проректорлары Геккиланы Солтан бла  Артур Кажаров,  МГИМО-ну преподаватели  Борис Ананьев,  Тыш сатыу-алыуну айнытыу эмда халкъла аралы экономика байламлыкъла жаны бла советни  битеудуния аналитика арасыны директору  Александр Коньков, Жаш тёлюню ишлери жаны бла федерал агентствону келечиси Карина Чуйкова, РФ-ни Тыш къыралла бла ишлерини министерствосуну къуллукъчусу Марина Крутенёва, МГИМО-ну Къабарты-Малкъарда биригиуюню таматасы Асхат Гукепшев,  КъМКъУ-ну  социал-гуманитар институтуну  директору Муслим Тамазов да жокълагъандыла.
Кёп миллетлени араларында байламлыкъланы къураугъа себеплик этген жыйылыуну  Артур Кажаров ачханды. Ол КъМКъУ-ну халкъла аралы  ишини юсюнден тынгылы хапар айтханды. Бюгюнлюкде КъМКъУ-да  40 къыралдан 1200 чакълы жаш бла къыз окъугъанларын да эсгертгенди.
Муслим Тамазов а форум Шимал Кавказда бошдан бардырылмагъанын, ол  Кюнчыгъышны бла Кюнбатышны бирге къошхан, христианлыкъны бла исламны, кёп халкъланы да бирикдирген буруннгулу  жер болгъанын айырып айтханды. «Кавказ халкъланы ёмюрлени теренинден келген  къонакъбайлыкълары бюгюн да магъанасын тас этмегенди»,-дегенди.  
Аслан Каскулов а  проектни магъанасыны юсюнден айтханды. «Аны мураты   тыш къыраллыланы Шимал Кавказ бла шагъырейлендириудю,  регионну юсюнден жаш тёлюню терс оюмун тюрлендириудю, аны адамларын, аланы турмушларын, ишлерин кёргюзтюудю. Эм магъаналы борч а  студентлени араларында байламлыкъланы кючлендириудю»,-деп, ол бу тюбешиу жаш адамлагъа  бир бирни ангыларгъа, шуёх болургъа, аны кёп жыллагъа сакъларгъа болушуругъуна ийнаннганын билдиргенди.
Андан сора Аслан Каскулов  Ян Ваславскийге бла Борис Ананьевге проектге себеплик этгенлери ючюн, КъМКъУ-ну оноучуларына уа форумгъа  къонакъбайлыкъ этгенлери  ючюн ыспас этгенди. Алгъыш  эмда насийхат сёзлерин  Александр Коньков, Борис Ананьев, Карина Чуйкова, 4-чю номерли гимназияны директору Римма Нагоева да айтхандыла. Дагъыда  МГИМО-ну проректору Андрей Байковну эмда  Жаш тёлюню ишлери жаны бла федерал агентствону башчысы Александр Бугаевни  алгъышлау письмолары да окъулгъандыла.
 Бу форумну хайырындан  дунияны кёп жерлеринден келген жаш адамла  Кавказны жаухарын –Къабарты-Малкъарны  эмда аны ёхтемлиги болгъан Элбрусну - кёрюрге онг тапхандыла. Конференцияны кезиуюнде  ала республиканы юсюнден кеслерини оюмларын айтхандыла. Адамларыбызны  огъурлулукъларын бек жаратханларын, табийгъатыбызны ариулугъуна да сукъланнганларын билдиргендиле.
 Сёзсюз, миллет ашарыкъларыбызны татыулары да  эсленмей къалмагъанды.  АБШ-ны Техас штатындан келгенле уа Малка ат заводда кёрген байталлагъа артыкъда бек бюсюрегендиле. МГИМО-ну студентлери Шимал Кавказ бла шагъырейленирге онг тапханлары ючюн форумну къурагъанлагъа жюрек ыразылыкъларын билдиргендиле. Къонакълагъа дагъыда «Ритмы гор» тепсеу ансамбль аламат концерт кёргюзтгенди.  
Конференциядан сора анга къатышханлагъа КъМР-ни Парламентинде аны депутатлары бла тюбешиу къуралгъанды. Аны ача, Парламентни Председателини орунбасары Михаил Афашагов Къабарты-Малкъарда парламентаризм къалай жаратылгъаныны, законла чыгъарыучу органны бешинчи чакъырылыууну ишини, Жаш тёлю палатаны юсюнден да хапарлагъанды.
Аны сёзюн андан ары бардыра, Парламентни Председателини башха орунбасары Жанатайланы Салим  законла чыгъарыучу орган къуралгъанлы 25 жылны ичинде 1800 закон къабыл этилгенини, бюгюнлюкде аладан 225-си ишлеп тургъаныны юсюнден билдиргенди. Федерал законланы жарашдырыу жаны бла ишни юсюнден да айтылгъанды. Депутатланы бу жолгъу къаууму Къырал Думагъа 24 башламчылыкъ жибергенди, аладан жетиси федерал законнга кийирилгенди.
Парламентни Билим бериу, илму эмда жаш тёлю политика жаны бла комитетини председатели Светлана Азикова да, къонакъланы алгъышлай: «Форумну хайырындан сиз керти Кавказны кёргенсиз. Адамланы араларында жууукълукъгъа жетген жокъду деп мен къуруда айтама. Къабарты-Малкъардан да  зауукълукъ алып, бери энтта да къайтыргъа сюеригизге ишексизме»,-дегенди.
Тюбешиуню кезиуюнде дагъыда КъМР-ни Парламентинде Жаш тёлю палатаны таматасы Созайланы Кязим, бу органны Къырал Думада Жаш тёлю палатада келечиси, Беларусь бла Россей союз къыралны Жаш тёлю палатасына кирген Алина Ашхотова да сёлешгендиле.
Форумгъа къатышханла депутатланы къауумуна соруула да бергендиле. Ала республикада не проблемала болгъанларын, жаш тёлю политика къалай къуралгъанын билирге сюйгендиле.
Ахырында МГИМО-ну политика теория жаны бла кафедрасыны преподаватели депутатлагъа ыразылыгъын билдиргенди.     
Форумну бизде барыууна  РФ-ни Къырал Думасыны  депутаты Анатолий Бифов, Жаш тёлюню ишлери жаны бла  федерал агентство, Къабарты-Малкъар къырал университет,  «Rethinking Russia» халкъла аралы  аналитика ара  себеплик этгендиле.